VOV4.Bahnar - Pơ gê ‘năr 10/8, tơ̆ Anih pơ re nơ̆r teh đak, 58 phố Quán Sứ, Hà Nội, Rađiô nơ̆r pơ ma Việt Nam pơ gơ̆r Hop akŏm tơ băt hơ dăh tơ drong tơ chơ̆t athei Đỗ Tiến Sỹ, Bơ ngai jang lơ̆m Anih chĕp kơ̆l pơ gơ̆r Trung ương Đảng, Kơ dră dơ nơm Anih rađiô nơ̆r pơ ma Việt Nam vang jang lơ̆m Anih chĕp kơ̆l, Anih pơ gơ̆r păng pơm Bí thư Đảng Anih rađiô nơ̆r pơ ma Việt Nam jăl jang 2020-2025.

Ƀok Huỳnh Tấn Việt pơ jao hla ar tơ chơ̆t păng hơ păh pơ kao ăn ƀok  Đỗ Tiến Sỹ

Pơ jao hla ar tơ chơ̆t ăn kơ ƀok Đỗ Tiến Sỹ, ƀok Huỳnh Tấn Việt, Bí thư Đảng grŭp rim anih jang Trung ương hmach chhôk hơ iă kơ ƀok Đỗ Tiến Sỹ Kơ dră dơ nơm kơ Anih rađiô nơ̆r pơ ma Việt Nam iŏk hơ năp jang pơm Bí thư Đảng anih rađiô jăl jang 2020-2025 hơ dai hăm ‘noh tơ ƀôh đon lui ngeh ƀok Đỗ Tiến Sỹ gô hơ dai hăm đĭ đăng Khŭl chĕp kơ̆l pơ gơ̆r Anih rađiô nơ̆r pơ ma Việt Nam pơ jing, hơ tŏk tơ iung Rađiô pran kơ tang, 1 jơ hngơ̆m đon, drơ̆ng 1 nơ̆r vă pơm lăp hăm ‘mĕh vă roi ‘năr roi lơ đơ̆ng 1 anih jang chih kơ tơ̆ng ang ‘nao, lơ kơ loăi, lơ tơ drong.

Thuem: Tơ blơ̆