VOV4.Bahnar - Pơ gê 6/4, tơ̆ Hà Nội, Đảng khul Mặt trận Tổ quốc Việt Nam pơ gơ̆r hop akŏm roi tơ băt tơ drong tơ chơ̆t đơ̆ng Anih tơm Chinh trĭ găh tơ drong jang kăn ƀô̆. Kiơ̆ kơ ‘nŏh, ƀok Đỗ Văn Chiến, Bí thư Trung ương Đảng, Bí thư Khul chĕp kơ̆l đảng, Kơ dră Anih vei lăng hơ drĕch kon kông pơm Bí thư Đảng khul MTTQ Việt Nam jăl jang 2019-2024.

Kơ dră jang lơ̆m Anih tơm Chinh trĭ, Phŏ Kơ dră Kuô̆k hô̆i Trần Thanh Mẫn vang truh hop akŏm. Hơ iă hăm ƀok Đỗ Văn Chiến đei Anih tơm Chinh trĭ pôk pơm Bí thư Đảng khul MTTQ Việt Nam, ƀok Trần Thanh Mẫn lui hăm kơ chư̆k ‘nao, ƀok Đỗ Văn Chiến kŭm hăm khul jang Đảng găh MTTQ Việt Nam vă jang ‘lơ̆ng tơ drong jang đei tơ lĕch, hơ nơ̆ng tơ iung hơ năp jang đơ̆ng Mặt trận lơ̆m chăl hrei ‘nâu, tơ găl hăm đon lui mă Đảng, Tĕh đak păng kon pơ lei ‘măn ăn Mặt trận.

Dơ̆ng: Tơ blơ̆