VOV4.Bahnar - Pơ gê 13/5, tơ̆ Hà Nội, Anih krao hơ vơn kon pơ lei Trung ương pơm lêh roi tơ băt tơ drong tơ chơ̆t đơ̆ng Anih tơm Chinh trĭ găh tơ drong pơ jao kơ chư̆k pơm Phŏ Kơ dră Anih krao hơ vơn kon pơ lei Trung ương. Lơ̆m hop akŏm, Phŏ Kơ dră Anih pơ gơ̆r Trung ương Hà Ban roi tơ băt tơ drong tơ chơ̆t đơ̆ng Anih tơm Chinh trĭ găh tơ drong pơ jao kơ chư̆k pơm Phŏ Kơ dră Anih krao hơ vơn kon pơ lei Trung ương.

Kiơ̆ tơ drong tơ chơ̆t, Kơ dră jang lơ̆m Trung ương Đảng Phạm Tất Thắng pơ dơ̆h pơm Phŏ Kơ dră Anih vei lăng jŏh ayŏ kơ dŏ xoang, pơ tho pơ hrăm, druh dăm, hơ iŏh iĕ kơ Kuô̆k hô̆i jăl XIV vă iŏk jang kơ chư̆k Phŏ Kơ dră Anih krao hơ vơn kon pơ lei Trung ương.

Pơ ma lơ̆m jơ iŏk tơ drong jang, Phŏ Kơ dră Anih krao hơ vơn kon pơ lei Trung ương Phạm Tất Thắng pơ ma hơ dăh vă hơ nơ̆ng hơ tŏk jơ hngâm đon jang chinh trĭ; hŏk pơ hrăm, pơ tâp, vei kơ jăp jơ hngâm đon ‘lơ̆ng, trong arih xa hơ iă; adrin jang ‘lơ̆ng dôm tơ drong jang đei pơ jao yoa tơ drong jang atŭm đơ̆ng Anih krao hơ vơn kon pơ lei Trung ương păng tơ drong jang krao hơ vơn kon pơ lei đơ̆ng Đảng.

Dơ̆ng: Tơ blơ̆