VOV4.Bahnar - Hlŏh 20 sơnăm tơklep hăm Hnam trương jăl kơ đĕh Nguyễn Trường Tộ, tơ̆ tơring Ea H’Đing, apŭng Cư M’gar, dêh char Dak Lăk, ƀok thây Lương Hữu Hải mă đơ̆ng erĭh sa mĭnh ‘nu mĭnh drô̆ lơ̆m hnam mơng mălei hlôi tơgum ăn kơ hrĕng hŏk tro dơnŭh hoei chă hŭt hŏk mơlô̆h mơlônh. Ư̆h khan lăp hơdrô̆ pơtho chư, ƀok thây oei tơgŭm djru rim đe ŏh ŭnh hnam hơtăih đei hơnĭh oei sa đĕch, chă hơvơn hơbĕn ao, kơsơ̆p hla bơar hŏk, hla bơar chĭh, gre tang vang pôk ăn hŏk tro tơnap tap; iŏk rong ‘me dôm đe hŏk tro ŭnh hnam mơmat tat hlŏh, tơgŭm ăn đe ŏh năm hŏk tơ̆ hnam trương ‘lơ̆ng hơ iă

Ƀok thây Lương Hữu Hải pơtho ăn rim đe ŏh hŏk ƀai

Đơ̆ng lơ sơnăm kơ au, hơnĭh hnam ăn oei mơng tơ̆ trong koeng mơ̆t lơ̆m pơlei Ea Sang, tơring Ea H’Đing, apŭng Cư Mgar, dêh char Dak Lăk hlôi jing pơbŭng hnam tơnŏ kơ dôm đe hŏk tro kon kông tơnŭh. Hnam mơng oei kơ yuơ ƀok thây Lương Hữu Hải, ƀok thây pơtho nơ̆r Anh, Kơdră chĕp pơgơ̆r khŭl đô̆i Hnam trương jăl kơ đĕh Nguyễn Trường Tộ mơng oei, ư̆h khan lăp hơnĭh chă tep pơdơ̆h đĕch ăn hlŏh 30 ‘nu hŏk tro dơnŭh, mă lei oei jing hơnĭh ƀok thây chă pơtho đĕch nơ̆r Anh ăn dang 150 ‘nu hŏk tro tơnap tap. Atŭm hăm ‘nŏh, ƀok thây oei iŏk rong ‘me ăn lơ hŏk tro unh hnam tơnap tap hlŏh. Jĭ mĭnh lơ̆m dôm hŏk tro đei ƀok thây Hải iŏk rong ‘me, ŏh H’Ba Su Đi M’lô pơma: “Ŭnh hnam nhôn tôch mơmat tat, mĕ ƀă chă năm jang tơ̆ hơtăih. Ƀar ‘nu mai ŏh nhi oei hăm ƀok yă. Đơ̆ng mă đei ƀok thây Hải tơgŭm djru sŏng sa, hơbĕn ao hrŭk ‘nŏh dă ƀiơ̆ mơmat bơih, bơnê kơ ƀok thây dêh. Ĭnh gô hơdrin hŏk pơhrăm vă hoei lao đon mă ƀok thây vei lăng năng tông tơnăp au”.

Rơbau kơsơ̆p hla bơar hŏk đei ƀok thây Hải apĭnh pôk ăn hŏk tro tơnap tap

Ƀok thây Lương Hữu Hải hlôi tơklep hăm Hnam trương jăl kơ đĕh Nguyễn Trường Tộ, tơ̆ tơring Ea H’Đing, apŭng Cư Mgar, dêh char Dak Lăk hlŏh 20 sơnăm. ‘Nau hnam trương lơ̆m tơring kon kông, tơdrong erĭh sa kơ kon pơlei oei tôch tơnap tap. Tơroi găh tơdrong tơdrong jang kơ dĭh, ƀok thây Lương Hữu Hải tơroi:“Kơdĭh ba tơklep hăm groi tĕh Tây Nguyên đơ̆ng ‘lơ̆p, đơ̆ng lăm 3, lăm 4. Sơ̆ jei tơnap tap chă hŏk pơhrăm, đei ƀok thây kô, bôl boăl tơgŭm djru kơna mư̆h ĭnh vĭh hơlơ̆k tơ̆ au dơ̆ng, ba chă tơchĕng iung jang tơdrong yă kiơ ‘nŏh vă bơnê ăn tơdrong tơgŭm djru đơ̆ng đe ƀok thây kô. Păng mă kăl tơ̆ au tơring kon kông, rim đe mon tôch tơnap tap, tơdrong chă năm hŏk, pơdơ̆h kơ hŏk jĭ ƀô̆h hơnơ̆ng đĕch kơna ba hơdrin vang chă tơgŭm djru hiă tŏ sĕt”.

Ƀok Bùi Đình Thảo, Kơdră chĕp pơgơ̆r Hnam trương jăl kơ đĕh Nguyễn Trường Tộ tơbăt, tơ̆ tơring kon kông atăih yăih au, rim ƀok thây kô ư̆h khan lăp hơdrô̆ chă pơtho hŏk mă lei oei đei tơdrong jang chă pơrô̆ pơrôp, krao hơvơn, tơgŭm djru hŏk tro hoei hŭt hŏk mơlô̆h mơlônh. Lơ sơnăm au ki, ƀok thây Lương Hữu Hải ling lang jing ƀok thây pơm jŭk yŭk trong hơlau lơ̆m bơ̆ jang kiơ̆ tơdrong jang au.“Ƀok thây Lương Hữu Hải lơ̆m dôm sơnăm au ki hlôi đei iung jang tôch hơdăh, mă kăl lơ̆m bơ̆ jang chă pơrô̆ pơrôp, krao hơvơn, tơgŭm djru tơmam drăm ăn rim đe ŏh hŏk tro, mă kăl hŏk tro dơnŭh hơdrin hŏk pơhrăm lơ̆m tơring Ea H’Đing pơma atŭm păng hnam trưng Jăl kơ đĕh Nguyễn Trường Tộ pơma hơdrô̆. Ƀok thây hlôi yak hlŏh tơdrong tơnap tap hrat hrĭn kơ dĭh, kơ yuơ ƀok thây Hải dang ei jei oei tơnap tap, ƀok thây oei mĭnh ‘nu mĭnh drô̆, ư̆h kơ đei hnam kơ dĭh. Ƀok thây rơ̆ih iŏk mĭnh hơnĭh oei iĕ tơgŭm djru ăn rim đe ŏh, mă kăl tơgŭm djru rim đe ŏh ŭnh hnam dơnŭh ư̆h kơ đei hnam oei. Trŭh gơmăng ‘nŏh ƀok thây pơtho đĕch ăn mĭnh ƀar ‘nu hŏk tro oei tơ jê̆. Nhôn jei chă tơgŭm ăn lăp tŏ sĕt đĕch găh jơ ‘năr, găh tơdrong yă yơ yak, tơgŭm djru tơbăt ăn khŭl kơdră tơring găh tơdrong bơ̆ jang kơ ƀok thây”.

Ƀok Nguyễn Hữu Nhất, Kơdră chĕp pơgơ̆r Dơnŏ anĭh vei lăng kon pơlei tơring Ea H’Đing tơbăt, rim sơnăm ƀok thây Lương Hữu Hải hlôi tơgum djru, chă pơrô̆ hơvơn đei dang 30 ‘nu hŏk tro ŭnh hnam tơnap tap hŭt hŏk vĭh hơlơ̆k năm hŏk dơ̆ng. Đơ̆ng blŭng sơnăm hŏk trŭh dang ei, ƀok thây Hải hlôi chă hơvơn đei rơbau kơsơ̆p hla bơar hŏk, hơbĕn ao ‘nao, gre tang vang ... kơ jă kơ jên vă jê̆ 200 trĭu hlak jên tơgŭm djru ăn hŏk tro tơnap tap bơngai kon kông. Lơ̆m ‘măng jĭ hơbŭh au ki, ƀok thây Hải chă hơvơn đei 65.000 blăh che gom ƀŏ, hlŏh 460 kơlich đak pơgang ôp ti păng 21 tŏ kmăi pơtŏ yŭh akau jăn tơgŭm ăn tơring tang găn jĭ hơbŭh.“Hăm rim tơdrong jang tơgoăt hăm rim khŭl ‘mêm mơnat lơ̆m dêh char păng dêh char anai, ƀok thây hlôi dăr lăng hơlen rim hŏk tro kon kông kơtă erĭh sa tơnap tap găh kơsơ̆p hla bơar hŏk pơhrăm, hla bơar chĭh, gre tang vang. Ƀok thây hlôi tơgoăt păng iung jang năm tơgŭm djru ăn rim hŏk tro lơ̆m tơring. Lơ̆m bơ̆ jang tang găn jĭ hơbŭh Covid-19 lơ̆m tơring, khei năr au ki ƀok thây jei hlôi iung jang hơdoi hăm rim bơngai đei jơhngơ̆m đon ‘lơ̆ng chă krao hơvơn, tơgŭm djru tơmam drăm ăn rim bơngai dơnŭh, bơngai tơnap tap, dôm bơngai ăn oei hơdrô̆, hơnĭh pơvang tang găn. Krao hơvơn tơgŭm ăn rim hnam trương bơ̆n kmăi pơtŏ yŭh akau jăn, đak pơgang ôp ti, che gom ƀŏ”.

Hăm jơhngơ̆m đon ‘mêm kơ eng, ƀok thây Lương Hữu Hải hlôi hơchăng tơ̆ rŏng dôm tơdrong kơ dĭh, hơnơ̆ng pơvĭh tơgŭm djru ăn kơ hrĕng hŏk tro tơnap tap hơdrin năm hŏk pơhrăm tơ̆ hnam trương, vă đei jing dôm bơngai đei iŏk yua ‘lơ̆ng hơ iă ăn tơpôl.

Bơngai chĭh: Tuấn Anh

Tơblơ̆ nơ̆r: Amazưt