VOV4.Bahnar  – Pơgê năr 22/10, tơ̆ plei tơm Hải Phòng, Anih jang Kơpal Khul linh Trung ương, lơ̆m Anih tơm Linh pơm lêh tơbăt 60 xơnăm 'Năr pơh trong Hồ Chí Minh tơ̆ đak dơxĭ (23/10/1961 -  23/10/2021). Ƀok Tổng Bí thư Nguyễn Phú Trọng năm akŏm lêh. Lơ̆m khei năr tơblăh Mih dŏng teh đak, hăm tơdrong pơkăl tơtom tơgŭm ăn kơdrăn tơblăh tơring pơbăh, năr 19/5/1959, Khul linh tơ̆ tơring păng Anih tơm Linh tơchơ̆t pơjing Khul jang kăp gĭt (đơ̆ng rŏng kơ noh tơplih hơnăn Đoàn 559), đei xơnong pơih trong chơ pơdŭ tơmam drăm, xơng 'nhăk khul ƀô đô̆i, kang ƀô̆ đơ̆ng tơring găh tu năm truh pơbăh đơ̆ng pơbăh lĕch truh găh tu. Đơ̆ng rŏng chă hơlen, păng hơmet tôm tơdrong, năr 23/10/1961, Anih tơm linh pơkăp pơjing Đoàn 759 chơ khul linh kiơ̆ đak dơxĭ. Tơdrong iung jing kơ Đoàn 759 atŭm hăm tơdrong pơjing jăl trong tơgŭm Tu – Pơbăh tơ̆ đak dơxĭ jing tơdrong tơm pơm gru kăp gĭt ăn tơdrong pơih trong chơ pơdŭ kăp gĭt togŭm ăn tơring pơbăh đei hơnăn Ƀok Kơdră Hồ Chí Minh 'mêm kơ eng. Đunh xơnăm yăm kơ khei, mă lei jăl trong Hồ Chí Minh tơ̆ đak dơxĭ ling lang jing tơdrong hơ iă pơ ư pơ ang kơ Khul linh păng kon pơlei Việt Nam, jing um pơtih ang hơdăh ăn chăl tơjră nuih mơng kơ kăch mạng, kơ đon gơh rơgei, jơhngơ̆m nuih mơng, khŏm mă iŏk jơnei, rơngei hiôk hian ăn teh đak păng kon pơlei.

Lan chih păng pơre nơ̆r