VOV4.Bahnar – Ƀok TỔNG BÍ THƯ NGUYỄN PHÚ TRỌNG hlôi tơlĕch nơ̆r krao hơvơn pơtruh ăn kon pơlei, khul linh lơ̆m jâ̆p teh đak păng kon pơlei bơ̆n tơ̆ teh đak đe găh tang găn păng tơjră pơrang jĭ Covid-19. Lơ̆m kơthơ, ƀok Tổng bí thư ră hơdăh: “Dang ei, pơrang jĭ Covid-19 duh oei hơbuh hli hlơt, tơpoh tôch tenh, pơrăm tih tên găh jơhngơ̆m jăn păng tơdrong erih kon pơlei, pơrăm kơtang truh mŭk drăm – tơpôl păng rim tơdrong erih jang xa. Hăm pơkăp  "tơjră pơrang jĭ nhen tơjră ayăt", vei xơđơ̆ng jơhngơ̆m jăn, tơdrong erih kon pơlei mă adrol, tang măt ăn kơ Đảng păng Teh đak, inh hơvơn tôm anih jang Đảng, tôm kon pơlei, tôm khul linh păng kon pơlei bơ̆n tơ̆ teh đak đe: Bơ̆n hlôi adrin bơih dang ei roi adrin hloh dơ̆ng; hlôi tơguăt tơguăl bơih dang ei roi tơguăt hloh dơ̆ng; hlôi kơ 'nôh noh roi kơ 'nôh hloh dơ̆ng; tôm hơdrung hơdrĕch rim bơngai nhen minh, minh đon minh bơnôh atŭm hăm Đảng, Khul kơpal teh đak, dôm jăl jang, rim anih jang chă trong tang găn, tơpăt khŏm mă keh, ưh đei lê̆ pơrang jĭ tơpoh lang xă lơ̆m tơpôl. Inh pơkăl dôm jăl jang đảng, jơnŭm pơgơ̆r tơring, anih pơgơ̆r jang tang găn păng tơjră pơrang jĭ Covid-19 đơ̆ng Trung ương truh tơ̆ tơring athei kơjăp hloh lơ̆m tơdrong pơgơ̆r jang; akŏm kơjung hloh găh jơhngơ̆m, jơ 'năr, axong rim tơdrong vă tơjră hăm tơdrong hơbuh hli đơ̆ng pơrang jĭ; athei hơbĕch, gơh rơgei lơ̆m tơdrong pơm jang đei jơnei tơdrong jang kăp gĭt âu...

Inh lui ngeh kăp gĭt, jâ̆p teh đak tơgop jơhngơ̆m, tôm anih jang Đảng, tôm kon pơlei minh bơnôh, drơ̆ng nơ̆r păng pơm jang, atŭm hăm tơdrong tơgŭm đơ̆ng kon pơlei tơ̆ teh đak đe păng bôl boăl apŭng plenh teh, noh bơ̆n gô đei jơnei tơjră pơrang jĭ Covid-19 păng athei pơkăp khŏm mă đei jơnei, tơgop kăp gĭt lơ̆m tơdrong adrin atŭm kơ tôm kon bơngai kơyuơ kơ minh apŭng plenh teh xơđơ̆ng, hiôk hian, tơbôl, jang hadoi păng jơnap, tơgăl hăm tơdrong juăt jue nuih mơng kơ Teh đak bơ̆n, Hơdrung hơdrĕch bơ̆n !.”

Lan chih păng pơre nơ̆r