VOV4.Bahnar  – Năr 11/8 tơ̆ Anih jang Khul Kơpal teh đak pơgơ̆r tơdrong hop akŏm trư̆k tuyê̆n jâ̆p teh đak 'măng mă blŭng kơ Khul kơpal teh đak jăl xơnăm 2021-2026 tơlĕch pơm kiơ̆ Tơchơ̆t Hop akŏm Đảng jâ̆p teh đak 'măng mă 13 păng Tơchơ̆t đơ̆ng Kuôk hô̆i jăl 15 găh hơtŏk mŭk drăm tơpôl 5 xơnăm đơ̆ng 2021-2025.

          Ƀok Tổng Bí thư Nguyễn Phú Trọng năm akŏm păng pơma pơgơ̆r hop akŏm. Ƀok Tổng Bí thư Nguyễn Phú Trọng ră hơdăh, Hop akŏm jâ̆p teh đak 'măng mă 13 kơ Đảng hlôi đei jơnei keh kong 'lơ̆ng rŏ, drơ̆ng nơ̆r kơjung hloh tơlĕch Trong jang hơtŏk tơ iung păng vei lăng teh đak, lơ̆m noh đei Trong jang hơtŏk mŭk drăm – tơpôl 10 xơnăm đơ̆ng 2021 - 2030, xơkơ̆t truh xơnăm 2045, hơ 'nhăk teh đak bơ̆n jing teh đak hơtŏk tơ iung đei iŏk yua lơ păng xơkơ̆t xơnong jang hơtŏk mŭk drăm – tơpôl 5 xơnăm đơ̆ng 2021 - 2025. Vă keh đang jơnei dôm tơdrong tơchơ̆t tơlĕch, ƀok Tổng Bí thư Nguyễn Phú Trọng pơkăl, Khul kơpal teh đak jăl jang 2021 - 2026 athei pơtoi chĕp vei pran hloh dơ̆ng, tơnăp hloh dơ̆ng tơdrong nuih mơng juăt jue, dôm tơdrong đei jơnei tih păng dôm ƀai hŏk kăp gĭt mă Khul kơpal teh đak kơ dôm chăl hlôi pơm jang đei jơnei; kơ 'nôh hloh dơ̆ng kiơ̆ jăl trong tơplih 'nao, hơtŏk pơ 'lơ̆ng, đei jơnei tơdrong pơm jang lơ̆m jăl hơtŏk jang 'nao.

Lan chih păng pơre nơ̆r