VOV4. Bahnar - Ƀlep lơ̆m năr Lê̆h tĭh Phật đản Phật lịch 2565, dương lịch 2021 păng tơbăt 40 sơnăm Năr pơjing Khŭl lui Phật Việt Nam (1981 - 2021), pơgê năr 19/5, tơ̆ Hà Nội, Kơdră jang lơ̆m Dơnŏ anĭh tơm Chĭnh trĭ, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn hlôi năm ngôi, hmach chơt hơ iă ăn Hòa thượng Thích Thanh Nhiễu, Kơ iĕng Kơdră chĕp pơgơ̆r Khul lui Phật Việt Nam, atŭm hăm Hơnĭh jang mă 1 găh Trung ương Khŭl lui Phật Việt Nam. Tang păt ăn Kơdră chĕp pơgơ̆r Đảng păng Tĕh đak, ƀok Trần Thanh Mẫn pơtrŭh ăn đĭ đăng ƀok soi, kon pơlei lui Phật Việt Nam dôm nơ̆r hmach chơt hơ iă hlŏh; hmach ăn Khŭl lui Phật Việt Nam sơng mĭnh pơyan Phật đản chơt hơ iă ‘nă hal păng ling lang tơgoăt tơgoăl lơ̆m khŭl tơgoăt tơgoăl đĭ đăng hơdrĕch hơdrung. Pơma hơdăh, tơdrong jĭ hơbŭh Covid-19 tŏk bŏk tơpŏh kơtang păng tôch hơmơt tơt ƀlep lơ̆m jơ ‘năr pơgơ̆r pôk rơ̆ih Kơdră tang măt Kuô̆k hô̆i jăl XV păng Jơnŭm vei lăng kon pơlei rim hơnĭh, ƀok Trần Thanh Mẫn ‘mĕh vă Khul lui Phật Việt Nam chă hơvơn kon pơlei lui phật vang năm tăh hla sơđơ̆ng, jơnei; adoi pơma tơbăt jơhngơ̆m đon hơmŏ rim ƀok soi lui phật ‘nŏh bơngai đei hơnăn ăn pôk tơmơ̆t kơdră tang măt Kuô̆k hô̆i jăl XV păng kơdră tang măt Jơnŭm vei lăng kon pơlei jăl jang 2021 - 2026 đei jing bơngai tang măt gô đei dơ̆ng nơ̆r pơma tơbăt dôm tơdrong hơpơi ‘mĕh vă đơ̆ng kon pơlei ăn kơ Đảng, Tĕh đak băt.

Tơblơ̆ nơ̆r: Amazưt