VOV4.Bahnar - Pơgê năr 26/4, Dơnŏ anĭh Pôk rơ̆ih pơlei tơm Đà Nẵng pơgơ̆r hop akŏm mă 4 klăh asong hơnăn bơngai vă pôk tơmơ̆t pơm Kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021-2026; tơlĕch trong jang tơ ƀơ̆p pơma dơnŭh hăm bơngai tăh hla đơ̆ng rim kơdră đei hơnăn ăn pôk tơmơ̆t pơm kơdră tang măt Kuô̆k hô̆i păng Jơnŭm vei lăng kon pơlei kơ pơlei tơm.

Dơnŏ anĭh pôk rơ̆ih pơlei tơm Đà Nẵng pơgơ̆r hop akŏm mă 4

Kơdră jang lơ̆m Dơnŏ anĭh tơm Chĭnh trĭ, Thường trực Ban Bí thư Võ Văn Thưởng đei Trung ương pơtrŭh ăn pơm Kơdră tang măt Kuô̆k hô̆i tơ̆ pơlei tơm Đà Nẵng. Tơ̆ Hop akŏm, rim kơdră tang măt hlôi drơ̆ng minh nơ̆r chĭh tơmơ̆t dơ̆ng hơnăn kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021- 2026 ‘moi kiơ̆ rim hơnĭh pôk rơ̆ih. Kiơ̆ kơ ‘nŏh, pơlei tơm Đà Nẵng đei 10 ‘nu kơdră vă pôk tơmơ̆t pơm Kơdră tang măt Kuô̆k hô̆i jăl XV, lơ̆m au đei 2 ‘nu kơdră kơ yuơ Trung ương pơtrŭh ăn ‘nŏh Kơdră jang lơ̆m Dơnŏ anĭh tơm Chĭnh trĭ, Thường trực Ban Bí thư Võ Văn Thưởng hăm yă Nguyễn Thị Kim Thúy, Kơdră jang lơ̆m Dơnŏ anĭh bơ̆ jang vei lăng rim tơdrong tơpôl kơ Kuô̆k hô̆i.

Tơblơ̆ nơ̆r: Amazưt