VOV4.Bahnar - Pơ gê ‘năr 23-11, Kơ dră tang măt Võ Văn Thưởng, bơ ngai jang lơ̆m Anih tơm Chĭnh trĭ, chĕp kơ̆l pơ gơ̆r Ban Bí thư păng Khŭl tang măt Kuôk hô̆i pơ lei tơm Đà Nẵng đei jơ tơ ƀơ̆p pơ ma dơ nuh hăm bơ ngai tăh hla 5 quận Hải Châu, Thanh Khê, Sơn Trà, Ngũ Hành Sơn păng Cẩm Lệ, pơ lei tơm Đà Nẵng vă tơ roi tơ băt pơ tôch ‘măng hop akŏm mă 2, Kuôk hô̆i jăl XV. Lơ tơ drong đei bơ ngai tăh hla bơ ngơ̆t truh tơ roi nơ̆r tơ gop tơ̆ jơ tơ ƀơ̆p pơ ma dơ nuh hăm bơ ngai tăh hla nhen tơ drong jang tang găn sa pơ jĭp kăl kơ tang hloh dơ̆ng; kăl hơ tŏk trong jang tơ gŭm ăn bơ ngai bơ̆ jang tơ̆ tơ ring. Tơ drong jang tang găn jĭ Covid-19, bơ ngai tăh hla athei tơ lĕch jang tơ tĕnh tơ gŭm, pơ̆ih să bơ ngai đei ƀơm ưh kơ ‘lơ̆ng, tơ gŭm vei lăng sơ đơ̆ng tơ drong arih sa tơ pôl. Ƀok Võ Văn Thưởng, chĕp kơ̆l pơ gơ̆r Ban Bí thư pơ ma hơ dăh: Trung ương, Anih tơm Chĭnh trĭ ling lang bơ ngơ̆t truh tơ drong hơ tŏk tơ iung kơ pơ lei tơm Đà Nẵng. Lơ̆m kơ plăh hơ tŏk tơ iung, athei đảng bộ, khŭl kơ dră pơ lei tơm athei hơ drin, đei trong jang hơ tŏk tơ iung kơ jăp ‘lơ̆ng.

Thuem: Tơ blơ̆