VOV4.Bahnar - Kơ sơ̆ ‘năr 29/6, tơ̆ anih jang Trung ương Đảng, Khŭl tang măt Đảng bơ̆n yua đơ̆ng ƀok Võ Văn Thưởng, jang lơ̆m Ban Bí thư chĕp kơ̆l, hlôi vang Hop akŏm trực tuyến rim đảng Nga- ASEAN. Hop akŏm pơ gơ̆r kiơ̆ pơ cheh đơ̆ng Đảng teh đak Nga rơ ngei hiôk hian lơ̆m khei ‘năr sơ năm 2021 jĭ sơ năm tơ băt 30 sơ năm pơ jing tơ drong pơ vei Nga-ASEAN, 25 sơ năm pơ vei jang tơ dai pơ ma dơ nuh Nga-ASEAN. Tơ̆ Hop akŏm, Kơ dră chĕp kơ̆l rim đảng vang tơ roi tơ drong tơ chĕng găh tơ drong kăl hloh hơ met ming tơ drong sơ đơ̆ng păng jang hơ dai tơ ring châu Á-Thái Bình Dương. Rim bơ ngai tang măt tơ ƀôh tơ drong lăng kăl hăm pơ vei jang hơ dai Nga-ASEAN, drơ̆ng nơ̆r tŭn pran jang hơ dai lơ̆m rim tơ drong jang vei lăng cham char păng hơ tŏk tơ iung kơ jăp, sơ đơ̆ng kơ tơ̆ng ang  apŭng plĕnh teh, sơ đơ̆ng phe sa ƀa sŏng. Rim pang kŭm drơ̆ng nơ̆r găh tơ drong kăl hơ tŏk tơ iung jang hơ dai lơ đảng apŭng plĕnh teh vă pơm ‘lơ̆ng hloh dơ̆ng tơ drong pơ vei chĭnh trĭ, mŭk drăm păng tơ pôl đơ̆ng Liên bang Nga păng rim teh đak ASEAN; tơ gŭm pơ trŭt rim tơ drong hơ drin atŭm vă yak hloh long nol jơ̆p plei teh păng hơ met pơ ‘lơ̆ng rim tơ drong lơ̆m tơ ring.

Thuem: Tơ blơ̆