VOV4.Bahnar - Kơ sơ̆ brei (20/7), Kuô̆k hô̆i hlôi jang đang tơ drong pôk rơih Kơ dră Kuô̆k hô̆i jăl XV. Kiơ̆ kơ ‘nŏh, 475/475 ‘nu bơ ngai tang măt Kuô̆k hô̆i vang yơ̆r ti pơ drơ̆ng nơ̆r ăn tơ drong tơ chơ̆t pôk rơih Kơ dră Kuô̆k hô̆i. Thoi nŏh, Kơ dră Kuô̆k hô̆i Vương Đình Huệ đei pôk pơm Kơ dră Kuô̆k hô̆i jăl XV hăm lơ kơ phĭu tơ gŭm.

Ƀok Vương Đình Huệ đei pôk pơm Kơ dră Kuô̆k hôi dơ̆ng

Hăm kơ chư̆k pơm Kơ dră Kuô̆k hô̆i, ƀok Vương Đình Huệ vă plang đĭ jơ hngâm, kŭm hăm Kuô̆k hô̆i, Khul kơ dră lơ̆m Anih chĕp kơ̆l pơ gơ̆r Kuô̆k hô̆i, dôm anih jang kơ Kuô̆k hô̆i păng dôm bơ ngai tang măt Kuô̆k hô̆i, chĕp vei păng tưk tơ iung tơ drong juăt ‘lơ̆ng hơ iă lơ̆m 75 sơ năm Kuô̆k hô̆i Việt Nam, hơ nơ̆ng tơ plih ‘nao trong jang, hơ tŏk tơ drong ‘lơ̆ng, đei yoa lơ̆m tơ drong jang kơ Kuô̆k hô̆i yoa tơ drong tơm tôch gĭt kăl ‘nŏh pơ vih ăn tơ drong đei yoa kơ tĕh đak, hơ drĕch hơ drung, yoa tơ drong hiôk chơt kơ kon pơ lei.

Kiơ̆ tơ drong vă jang lơ̆m hop akŏm mă mônh, Kuô̆k hô̆i jăl XV, ‘năr 21/7 Kuô̆k hô̆i bơ̆ jang lơ̆m hnam hôp tơm, pơ ma nuh, drơ̆ng nơ̆r pôk rơih dôm kơ chư̆k lơ̆m Anih chĕp kơ̆l pơ gơ̆r Kuô̆k hô̆i.

Dơ̆ng: Tơ blơ̆