VOV4.Bahnar - Pơgê brei năr 31/3, Kuô̆k hô̆i hlôi bơ̆ jang keh đang tơdrong jang pôk rơ̆ih Kơdră chĕp pơgơ̆r Kuô̆k hô̆i jăl  XIV, Kơdră chĕp pơgơ̆r Jơnŭm pôk rơ̆ih Tĕh đak tơplĭh yă Nguyễn Thị Kim Ngân-bơngai hlôi đei Kuô̆k hô̆i tăh hla tơlĕch jang. Hăm kơphĭu drơ̆ng nơ̆r lơ, ƀok Vương Đình Huệ - Kơdră jang lơ̆m Dơnŏ anĭh tơm Chĭnh trĭ, Bí thư Đảng pơlei tơm, Kơdră Khŭl tang măt Kuô̆k hô̆i pơlei tơm Hà Nội hlôi đei Kuô̆k hô̆i pôk tơmơ̆t jang Kơdră chĕp pơgơ̆r Kuô̆k hô̆i jăl XIV, Kơdră chĕp pơgơ̆r Jơnŭm Pôk rơ̆ih tĕh đak.

Tơdrong tơchơ̆t găh pôk tơmơ̆t ƀok Vương Đình Huệ tŏk jang jei đei rim kơdră tang măt Kuô̆k hô̆i pơdrơ̆ng kiơ̆ hăm 473/473 kơdră tang măt vang pơdrơ̆ng nơ̆r drơ̆ng kiơ̆ (tơmơ̆t 98,54% akŏp măt bơngai tang măt Kuô̆k hô̆i).Iung pơma lăp đơ̆ng rŏng tŏk jang, Kơdră ‘nao chĕp pơgơ̆r Kuô̆k hô̆i Vương Đình Huệ sơkơ̆t gô iung jang đĭ jơhngơ̆m, atŭm hăm tơpôl Dơnŏ anĭh bơ̆ jang Kuô̆k hô̆i, rim hơnĭh jang Kuô̆k hô̆i kiơ̆ yok rok jơ̆ng, atŏk kơtang jang kiơ̆ ‘lơ̆ng dôm tơdrong joăt joe ‘lơ̆ng hơ iă păng jơnei tĭh tên đơ̆ng Kuô̆k hô̆i rim chăl, hơnơ̆ng tơplĭh ‘nao trong jang, jơnei bơ̆ jang kơ Kuô̆k hô̆i kơ yuơ bơ̆ jang tơgŭm ăn đei iŏk yua kơ Tĕh đak, hơdrĕch hơdrung, kơ yuơ tơdrong erĭh sa hơnŭk hơnoa kơ kon pơlei.

Tơblơ̆ nơ̆r: Amazưt