VOV4.Bahnar - Jang kiơ̆ tơdrong gơ̆h pơrô̆ hơvơn pôk tơmơ̆t kơ bơ̆n, 10 ‘nu kơdră đei hơnăn ăn pôk tơmơ̆t pơm Kơdră tang măt Kuô̆k hô̆i jăl XV păng 85 ‘nu kơdră tang măt Jơnŭm vei lăng kon pơlei dêh char, jăl jang 2021-2026 tŏk bŏk pơm kiơ̆ gơ̆h jang chă hơvơn kơ bơ̆n đei Dơnŏ anĭh Măt trân Tổ quốc Việt Nam dêh char Kon Tum tơlĕch jang tôch kơ ‘lơ̆ng, ƀlep hăm tơdrong tơchơ̆t.

Rim kơdră đei hơnăn ăn pôk tơmơ̆t pơm Kơdră tang măt Kuô̆k hô̆i jăl XV chă hơvơn pôk rơ̆ih tơ̆ apŭng Kon Brăih, dêh char Kon Tum

Bơ̆ jang tang găn jĭ Covid-19 tơ̆ rim hơnih tơ ƀơ̆p pơma dơnŭh hăm bơngai tăh hla hlôi đei hơnĭh jang pơgang tơring iung jang kơ jăp. Đĭ đăng bơngai tăh hla đei apĭnh jei tơl akhan, rim bơngai đei hơnăn ăn pôk tơmơ̆t pơm kơdră tang măt Kuô̆k hô̆i păng Jơnŭm vei lăng kon pơlei dêh char jei đei jơhngơ̆m đon ‘lơ̆ng, tơklep hăm kon pơlei; Trong tơlĕch iung jang tôch hơdăh, tơ ƀô̆h hơdăh hơnăp jang tơnăp kơ dĭh mư̆h đei bơngai tăh hla pôk tơmơ̆t pơm Kơdră tang măt Kuô̆k hô̆i păng Jơnŭm vei lăng kon pơlei dêh char.

Tơblơ̆ nơ̆r: Amazưt