VOV4.Bahnar - Kơsơ̆ năr 22/9, Dơnŏ anĭh vei lăng kon pơlei kơ pơlei tơm Buôn Ma Thuột (Dak Lăk) hlôi pơjing tơdrong tơchơ̆t kơsô̆ 4224 găh tơdrong ăn asong rim hơnĭh tĕch mơdro et sa (hơnĭh tĕch por ‘nhot, hơĭh tĕch huch chehphe) chă tĕch mơdro dơ̆ng, iŏk đơ̆ng năr 23/9/2021. Kiơ̆ kơ ‘nŏh, rim hơnĭh mơdro sa et sa, mư̆h đei tĕch mơdro dơ̆ng ‘nŏh jei pơm kiơ̆ kơ jăp rim trong tang găn jĭ Covid-19, nhen ư̆h kơ ăn hlŏh 10 ‘nu bơngai chă sŏng sa, et sa lơ̆m mĭnh ‘măng; tơdăh hơnĭh tĕch mơdro să hlŏh 150m2 đei ăn asong đe mơ̆t sŏng sa, et sa lơ hlŏh ‘nŏh 20 ‘nu bơngai. Rim tơngla hơnĭh tĕch mơdro kăl ăn bơngai bơ̆ jang chă pơtŏ lăng yŭh akau jăn tơmoi mơ̆t et sa, athei tơmoi chă ôp ti hăm đak pơgang, hơnơ̆ng ôp sut rơgŏh kơ ƀang, tang dŏ tơ oei lăp đơ̆ng rŏng tơmoi et sa đang. Dang ei, tơdrong jĭ hơbŭh lơ̆m pơlei tơm Buôn Ma Thuột hlôi tang găn kĕ, 6 hơnĭh đei ƀô̆h jĭ dơ̆ng tơ̆ rim phương Thành Nhất, Tân Thành, Tân Hòa hlôi tang găn kĕ, pă đei ƀô̆h bơngai 'nao tơpŏh jĭ; lơ̆m pơlei tơm đei 7 phương, tơring hlôi hlŏh 14 năr păng 11 phương, tơring hlôi hlŏh 7 năr pă đei ƀô̆h bơngai ‘nao tơpŏh jĭ lơ̆m kon pơlei.

Tơblơ̆ nơ̆r: Amazưt