VOV4.Bahnar - Kơsơ̆ năr 21/10, Dơnŏ anĭh vei lăng kon pơlei kơ pơlei tơm Buôn Ma Thuột, dêh char Dak Lăk pơjing tơlĕch hla bơar tơchơ̆t kăl, pơrô̆ athei rim tơring phương tơlĕch jang kơ hret rim trong jang tang găn jĭ vă tơ jră tang găn hơlau rim bơngai tơpŏh jĭ covid-19 lơ̆m kon pơlei tŏk lơ. Kiơ̆ kơ ‘nŏh, pơlei tơm athei hơnơ̆ng pơdơ̆h pơgơ̆r jang: Hơnĭh jŏh asoang, hnam hơri karaoke, bar, hnam massage, internet, hơnĭh pơchơt điện tư, hơnĭh kăt yoă sŏk, hơnĭh pơ djong, hơnĭh pơchơt pơ hiơ̆ đe hơ iŏh, cham đă ƀŏng lŏng; rim kơchơ iĕ, chă tĕch mơdro rok tơ̆ trong, tĕch mơdro jĭh trong, vĕ sô̆; năm hơkŭm, pơgơ̆r kơ̆m kang kơnang giĕng; jŏh ayŏ kơdŏ soang, đă ƀŏng lŏng tơplŏng kơdau lơ̆m hnam. Hăm rim hơnĭh tĕch mơdro et sa nhen hơnĭh et sa, sŏng sa, hơnĭh tĕch huch chehphe gơ̆h tĕch mơdro mă lei kăl pơm kiơ̆ rim tơdrong tơchơ̆t găh tang găn jĭ Covid – 19.

Khŭl jang pơgang khăm test rĕnh tơchă bơngai tơpŏh jĭ lơ̆m kon pơlei

Lơ̆m năr 21/10, Buôn Ma Thuột hlôi đei 30 ‘nu bơngai tơpŏh sơmach jĭ SARS – Cov2, lơ̆m au đei 12 ‘nu bơngai tơpŏh lơ̆m kon pơlei. Pơlei tơm hlôi tơchă dôm bơngai oei tơ jê̆, khăm test rĕnh ăn dang 4.000 ‘nu kon pơlei tơ̆ buôn Kŏ Siêr, phương Tân Lập vă tĕnh koăng tơchă ƀô̆h dôm bơngai F0 lơ̆m kon pơlei, tang găn jĭ hơbŭh. Jô̆ atŭm lơ̆m dêh char Dak Lăk, năr 21/10 hlôi đei 92 ‘nu bơngai tơpŏh jĭ SARS – Cov2. ‘Nau jing măt bơngai tơpŏh jĭ lơ̆m năr lơ hlŏh đơ̆ng sơ̆ trŭh dang ei.

Tơblơ̆ nơ̆r: Amazưt