VOV4.Bahnar - Lơ̆m khei ‘năr plt Buôn Ma Thuột vei kơ jăp tơ drong yak vih vât lơ̆m 5 năr vă akŏm jơ hngâm set hơ len hrĕnh jĭ SARS –CoV -2, khul kơ dră tơ ring, lơ anih jang, anih tĕch mơ dro kơ chăng pơm tơ lĕch, chơ tĕch mơ dro tơ mam xa truh hăm kon pơ lei.

Hơ iă mưh iŏk đei kơ dŭng tơ mam đei ‘nhot, ‘nhĕm, kơ tăp iĕr yoa bơ ngai jang lơ̆m Khul tang găn jĭ Covid lơ̆m tơ pôl kơ Kueng kơ phô̆ 7, phương Tân An, plt Buôn Ma Thuột năm răt tơ gŭm, mŏ Trần Thị Hằng tơ̆ trong Nguyễn Xuân Nguyên ăn tơ băt, unh hnam mŏ đei ƀơk ăn kơ phĭu năm kơ chơ lơ̆m gơ măng 26/8. Til pơ gê 27/8, mŏ gơih kơ phĭu năm kơ chơ lơ̆m grŭp zalo phương păng iŏk đei tơ mam tơ̆ kơ sơ̆.

“Inh ƀôh tơ drong phương tơ lĕch trong năm kơ chơ tơ gŭm ăn kon pơ lei lơ̆m khei ‘năr plt oei jang kiơ̆ tơ drong tơ chơ̆t 16 vă tang găn jĭ ‘nŏh tôch đei yoa. Nhôn ‘mĕh răt kiơ, lăp kăl alo, athei păih phương ‘nŏh gô đei bơ ngai năm răt tơ gŭm lê̆ unh hnam nhôn ngôi tơ̆ hnam tang găn jĭ. Inh ƀôh khul druh dăm, đang kơ ‘nŏh đe mŏ ŏh drŏ kăn jang tôch tơ năp, chă pơ ngơ̆t ăn kon pơ lei.”

Bơ ngai jang lơ̆m Khul tang găh jĭ COVID -19 lơ̆m tơ pôl năm kơ chơ tơ gŭm ăn kon pơ lei tơ̆ plt Buôn Ma Thuột

Plt Buôn Ma Thuột bơ̆ jang kiơ̆ trong pơ gang găn tơ pôl kiơ̆ tơ drong tơ chơ̆t 16 đơ̆ng 18h, ‘năr 26-7. Kiơ̆ kơ ‘nŏh, lơ̆m 5 năr blŭng, plt athei kon pơ lei lê̆ lĕch đơ̆ng hnam, vă akŏm jơ hngâm test hrĕnh ăn đĭ đăng 375 rơ bâu ‘nu kon pơ lei, vă chă ƀôh hrôih bơ ngai jĭ F0 lơ̆m tơ pôl. Lơ̆m khei ‘năr âu, Dơ nŏ anih vei lăng kon pơ lei plt Buôn Ma Thuột pơ jao ăn dôm xăh, phường pơ jing “siêu thĭ ưh iŏk jên” vă pơ vih ăn dôm unh hnam mơ mat tat, atŭm hăm ‘nŏh tơ lĕch trong “Năm kơ chơ tơ gŭm ăn kon pơ lei”.

Bơ̆ jang kiơ̆ trong ‘nâu tơ̆ phương Thống Nhất, ƀok Nguyễn Khắc Sơn, Bí thư chi bộ pơm hloi Kơ dră vei lăng Kueng kơ phô̆ 1, ăn tơ băt: “Rim unh hnam kon pơ lei gô đei ƀơk ăn kơ phĭu năm kơ chơ, tơ̆ rŏng kơ phĭu chih dôm tơ mam yoa kăl kơ răt lê̆ kon pơ lei chih ƀât dŏh. Kon pơ lei phĭn păng gơih lơ̆m zalo kơ Kueng kơ phô̆ nhôn. Kueng kơ phô̆ nhôn chih akŏm păng gơih ăn Dơ nŏ anih vei lăng kon pơ lei phương vă vơh bơ ngai năm răt tơ mam ăn kon pơ lei.”

Tơ drong pha ƀiơ̆ lơ̆m trong pơ truh tơ mam ăn kon pơ lei kơ plăh âu ‘nŏh, ‘măng mă blŭng dôm siêu thĭ, anih tĕch mơ dro lơ̆m plt Buôn Ma Thuột pơm kiơ̆ trong tĕch tơ mam kiơ̆ dôm “combo tơ mam yoa kăl” hăm kơ jă đơ̆ng 100.000 - 500.000 hlak jên vă pơm lăp hăm tơ drong răt yoa đơ̆ng kon pơ lei. 1 combo đei tôm tơ mam nhen: ‘nhĕm, ka, ‘nhot, ƀum, plei ‘long, đak kho, đak măm, kơ tăp iĕr, đak tŏh, phe, dôm tơ mam yoa kăl nai ăn kơ dih kâu păng unh hnam…. Dang ei đei 5 anih pơ truh tơ mam lơ̆m plt đei siêu thĭ Go Buôn Ma Thuột, siêu thĭ Co.opmart Buôn Ma Thuột, siêu thĭ MM Mega Buôn Ma Thuột, anih tĕch tơ mam Vinmart, anih tĕch tơ mam Bách hóa xanh vă tĕch tơ mam kiơ̆ trong tĕch online, tĕch kiơ̆ combo păng pơm kiơ̆ trong vei sơ đơ̆ng kơ jă lơ tơ mam yoa kăl.

Yă Trần Thị Thành Nhân, Phŏ Kơ dră vei lăng siêu thĭ Co.opmart Buôn Ma Thuột ăn tơ băt, siêu thĭ kơ chăng pơ truh tơ mam xa, tơ mam yoa kăl, hơ met khul jang pơ jao tơ mam mă tơ tom vă pơm lăp hăm tơ drong ‘mĕh vă đơ̆ng bơ ngai răt: “Anih nhôn chih pơ jing combo dôm tơ mam kăl găh ‘nhot, ƀum, plei ‘long, ‘nhĕm, ka vă pơ vih ăn kon pơ lei răt ƀônh, hrĕnh. Oei hăm tơ mam răt online ‘nŏh đei dôm kênh kiơ̆ facebook, zalo, kơ sô̆ điên thoăi kăl đơ̆ng nhôn chô̆, hơ met tôm bơ ngai jang vă tĕch, chơ pơ truh tơ mam, pơ jao tơ mam ăn bơ ngai răt hrĕnh hlŏh.”

Ƀok Lưu Văn Khôi, Kơ dră Anih vei lăng jang kơ măy, tĕch mơ dro dêh char Dak Lak ăn tơ băt, kiơ̆ tơ drong tơ chĕng đơ̆ng Anih vei lăng jang kơ măy, tĕch mơ dro, tơ mam đei kơ dih lơ̆m dêh char ‘nŏh đei 830.000 tŏ nhŭng; 305.000 tŏ kơ pô, rơ mo; iĕr bip dang 13.000.000 tŏ; ‘nhot, ƀum, plei ‘long đei 10.500 ha… năng atŭm đei măh mai tơ mam yoa ‘lơ̆ng tơ̆ tơ ring. Kŭm hăm ‘nŏh, phe păng dôm tơ mam yoa nai hlôi đei ‘măn răk lơ hlŏh 3 ‘măng pơ têng hăm năr hmă. Tơ mam yoa kăl đei vei lăng măh mai vă kon pơ lei sơ đơ̆ng jơ hngâm kŭm hăm tĕh đak vang tang găn jĭ:

“Tơ mam yoa jrăh jrai păng dôm siêu thĭ, dôm anih tĕch mơ dro đe đei trong mong akŏm tơ mam vă pơm lăp tôm tơ drong, tôch sơ đơ̆ng. Adrol kơ jang kiơ̆ tơ drong tơ chơ̆t 16 ‘măng mă âu kŭm ưh đei lơ kon pơ lei dui băl năm răt tơ mam 1 ‘măng lơ bơ ngai, mă tơ pă đe kŭm sơ đơ̆ng jơ hngâm ưh gan pơ ngơ̆t lơ.”

‘Nao âu, Dơ nŏ anih vei lăng kon pơ lei plt Buôn Ma Thuột, dêh char Dak Lak đei Hla ar chih tơ lĕch trong pơ truh phe ƀa, tơ mam xa lơ̆m khei ‘năr pơ vang găn tơ pôl kiơ̆ tơ drong Tơ chơ̆t 16/CT-TTg đơ̆ng Thủ tướng tĕh đak. Kiơ̆ kơ ‘nŏh, hăm tơ drong pơ truh tơ mam xa kiơ̆ đơ̆ng răt online gô đei bơ̆ jang kiơ̆ 2 trong. Mă 1, kon pơ lei răt tơ mam tơ păt tơ̆ anih tĕch mơ dro, bơ ngai chơ tơ mam đơ̆ng anih tĕch chĕp ba tơmam ‘nŏh truh tơ̆ hnam kon pơ lei, jên răt tơ mam đei kla trư̆k tuyê̆n mă ưh ‘nŏh kla kơ tă tơ̆ yăn âu mưh iŏk tơ mam. Mă 2, kon pơ lei apinh răt tơ mam păng gơih jên răt tơ mam kiơ̆ Khul jang tơ gŭm tơ̆ pơ lei pơ la, kueng kơ phô̆ lơ̆m dôm xăh, phường. Hăm trong jang âu, gre chơ tơ mam đơ̆ng anih tĕch pơ jao tơ mam ăn Khul tơ gŭm kơ xăh, phương, mă ưh ‘nŏh Dơ nŏ anih vei lăng kon pơ lei xăh, phương athei bơ ngai gre năm iŏk tơ mam đơ̆ng anih tĕch (tơ dăh anih tĕch ưh đei tôm gre chơ ba tơ mam), đơ̆ng rŏng kơ ‘nŏh pơ jao dơ̆ng ăn kon pơ lei.

Gre chơ tơ mam ‘nŏh jĭ gre đơ̆ng anih tĕch tơ mam xa mă ưh ‘nŏh gre yoa khul kơ dră tơ ring athei. Bơ ngai pơ jao tơ mam đơ̆ng anih tĕch athei hrŭk hơ băn ao lei lăi băl păng đei hla ar set hơ len ưh đei jĭ.

Dơ̆ng: Tơ blơ̆