VOV4.Bahnar - Chư Pưh hlôi jing apŭng pơ tăm tiu lơ kơ dêh char Gia Lai păng kŭm jing apŭng đei ƀơm kơ nê̆ kơ tang hloh yua đơ̆ng tiu đei jĭ păng tĕch reh. Tơ̆ hơ năp dôm tơ drong mơ mat tat kơ tang yua đơ̆ng iŏk yua gĭt kăl đei kăt đĭ, rim kơ dră Đảng păng khŭl kơ dră tơ̆ Chư Pưh tơ lĕch tơ drong jang gĭt kăl ‘noh jĭ tơ chă trong jang tơ gŭm rim pơ lei hơ met ming dơ̆ng ‘long pơ tăm kon tơ rong, sơ đơ̆ng jang sa dơ̆ng. Tơ pă yan âu tơ̆ plei Tung Đao, xăh Ia Đreng (Ia Drêng), apŭng Chư Puh ăn ƀôh, ƀơ̆t chi bộ pơ lei ƀôh đei dôm tơ drong mơ mat tat tơ hlăk tơ hlĭn, băt hơ dăh tơ drong ‘mĕh vă đơ̆ng tơ ring, hơ dai hăm kon pơ lei tơ chă trong jang hơ met pơ ‘lơ̆ng jang sa păng tơ drong arih sa kơ kon pơ lei gô tơ tĕnh sơ đơ̆ng hơ lơ̆k dơ̆ng.

Đĭ têt đei vă jê̆ 2 khei, ƀok Ksor Neo, 72 sơ năm oei tơ̆ plei Tung Đao, xăh Ia Dreng hlôi tĕch 1 pôm rơ mo păng chĕp jên năm tơ̆ hơ nih pơm hla ar kơ Anih mong jên tơ gŭm tơ pôl apŭng Chư Pưh vă kla ƀơk kơ sô jên hre hlôi tŏk iŏk đơ̆ng sơ năm 2017. Đơ̆ng rŏng kla, kơ sô̆ rơ kăh hre đơ̆ng 6 triêụ hlak jên, hlôi jur oei pă 3 triêụ hlak jên. Ƀok Ksor Neo tơ băt, ƀok tĕch rơ mo kon đei vă jê̆ 7 triệu hlak jên, mă lei kiơ̆ khei ‘năr pơ kăp lăp athei kla 3 triệu hlak jên, 4 triệu uơ oei dơ̆ng, sư lê̆ răt sa păng răt 1 pôm kơ măy ƀôm đak, tơ rŭih đak ăn kơ ‘nhĕt ‘nao pơ tăm lơ̆m pơ gar. Ƀok Ksor Neo tôch kơ lăp đon găh iŏk yua đơ̆ng tơ drong tŏk iŏk jên rong rơ mo.

Ĭnh tŏk iŏk jên teh đak tơ gŭm vă rong rơ mo. Đơ̆ng rŏng kơ rơ mo tuh, rơ mo kon ĭnh rong rơ mo yŏng ĭnh tĕch kla jên. Truh dang ei, rơ mo kon tih păng tuh 2 ‘măng bơ̆ih, ĭnh tĕch kla đĭ jên tơm hăm jên cheh hlôi tŏk iŏk. Ĭnh oei dơ̆ng 2 tŏ rơ mo păng lơi 10 triệu hlak jên.

Ƀơ̆t mă dôm bơ ngai ‘lŏ kră tơ̆ plei Tung Đao pơ nam hăm tơ drong jang rong rơ mo păng đei iŏk yua sơ đơ̆ng ‘noh dôm klo kăn mơ lôh tơ̆ âu ling lang hưch hanh hăm dôm trong jang sa ‘nao. Lơ̆m kơ sô̆ ‘nŏh đei klo kăn Ksor Uyn. Hơ iă găh tơ plih ‘nao lơ̆m trong jang đơ̆ng klo kăn sư gơ̆h ƀôh hloi tơ̆ trong pơ tăm ‘long sa plei. Păh hơ nih pơ găr ‘ngoăih, rim ‘long ƀơ păng sầu riêng ‘nao pơ tăm, tă kơ đei chô̆ kơ jăp hăm tơ ngơ̆l, đei pĕng kail hăm hơ drao nhươ̆ păng đei hơ nong klơ̆p tơm vă vei dơ nŏ. Tơ̆ pơ gar găh lơ̆m, hlŏh 400 tơ nơm mit plei lơ pơ tăm hơ lam cheh phe đơ̆ng Ksor Uyn hlôi lĕch lơ plei tih tŏ kơ phĭch đak, đei vei lăng pơ ‘lơ̆ng, ư̆h kơ lê̆ dôm plei hơ tŭt băl vă vĕh ver kơ hơ drông sa. Lơ̆m đak tơ rŭih re xuê xuê, Ksor Uyn chhôk hơ iă tơ roi găh tơ drong hŏk pơ hrăm dôm trong jang sa ‘nao vă iŏk jơ nei mŭk drăm lơ hloh:

Ƀơ̆t năm jang thuê ƀôh pơ tăm mit đơ̆ng đe jang dăh mă tơ drong arih sa đơ̆ng đe đei ƀôh, ĭnh ‘meh, chă hŏk kơ dih păng jang kiơ̆ pơ tăm mit nhen thoi âu. Ĭnh apĭnh trong đe sư jang đang kơ ‘noh brŏk jang kiơ̆. Kơ dih kâu ĭnh păng trong jang đơ̆ng ĭnh kŭm tam mă hơ iă ôh, tam mă iŏk đei jơ nei ôh. Sơ năm âu ki, đei  virus kơ na tam mă iŏk đei kiơ, sơ năm mit tŏk bŏk lĕch plei oei ‘lơ̆p, hơ mĕng gô ‘lơ̆ng hơ iă.

Kiơ̆ kơ ƀok Phạm Đình Nghĩa, Bí thư Chi bộ plei Tung Đao, pơ lei đei 267 ŭnh hnam, găh lơ ‘noh bơ ngai Jarai. Đơ̆ng rŏng dôm sơ năm hơ vơ̆l hơ vong yua kơ ‘long tiu tơm đei jĭ lôch păng găr tiu tĕch reh, kon pơ lei lơ̆m pơ lei hlôi tơ tom tơ lĕch jang lơ tơ drong jang ‘nao vă pơm tơ iung dơ̆ng mŭk drăm. Lơ̆m tơ drong jang yak hloh mơ mat tat ‘noh, rim đảng viên jang hơ dai hai, năm hơ drol hai. Mĭnh đảng viên đei klăih song chông ba 1 grŭp dang 30 ŭnh hna, vang tơ gŭm hăm kon pơ lei trong gơ̆h tŏk iŏk jên, tơ chă hơ nih jang pơ hrăm vă tơ lĕch jang rim tơ drong jang sa ‘nao, hơ dai hăm ‘noh jô̆ hơ len jang sa liơ vă kơ lăp hăm kơ sô̆ jên tŏk iŏk đei. Ƀok Phạm Đình Nghĩa tơ băt, pơ đĭ 9 đảng viên lơ̆m chi bộ păng rim ŭnh hnam kon pơ lei tă kơ băt hơ dăh kơ dih ‘noh bơ ngai kăl athei năm hŏk pơ hrăm. Hơ nih hŏk pơ hrăm đei iŏk yua hloh, đei băt hơ dăh ‘noh jĭ pơ gar jang kơ dôm kon pơ lei jang sa hơ gei lơ̆m apŭng, lơ̆m xăh, dôm bơ ngai jang ‘lơ̆ng păng tŏk bŏk jơ nei lơ̆m pơm tơ lĕch tĕch mơ dro:

Mĭnh đảng viên vei lăng 1 tơ ring iĕ, hơ drin rim sơ năm ‘noh tơ plih hloi đon hlôh  vao păng trong jang đơ̆ng 1,2 ‘nu kon pơ lei, găh lơ ‘noh jĭ bơ ngai Jrai đĕch. Oei Yuăn lơ̆m xăh ‘noh lơ bơ ngai oei hơ gei hloh kơ nhôn, hơ gei tôch kơ lơ. Mĭnh ‘noh gơ nang đơ̆ng dôm bơ ngai ‘noh pơ ma tơ gŭm, yua ư̆h kơ đei trong tơ roi tơ băt hơ yơ dang ‘moi kiơ̆ bơ ngai tơ pă tơ drong tơ pă. Ĭnh hăm kon pơ lei trŭh tơ̆ ‘noh, vă đei tơ drong hiôk pơ ma dơ nuh găh trong hơ tŏk tơ iung, gơh tŏk iŏk jên, khoa hŏk ki thuơ̆t păng trong iŏk yua jên, trong vei lăng... Jang kiơ̆ trong ‘noh iŏk yua hloh ƀiơ̆.

 Đơ̆ng rŏng 3 sơ năm tŭn pran tơ plih trong jang choh jang sa, rim hơ drĕch cheh phe plei lơ, lơ kơ loăi ‘long sa plei đunh sơ năm... hlôi đei pơ tăm lơ tơ̆ Tung Đao, hăm hloh 60hek tar yak blŭng ăn iŏk yua. Tơ drong jang rong rơ mo joăt joe kŭm tŏk lơ ƀơ̆t đei 1,2 ŭnh hnam rong truh 2,3 jĭt tŏ păng băt pơ tăm thim ‘nhĕt mă ư̆h kơ rong hmă hơ chăng nhen hơ drol sơ̆ bơ̆ih. Kơ lih thoi noh, lơ̆m jăl jang 2018-2020 ƀĕnh mơ mat tat, Tung Đao oei tơ jur đei kơ sô̆ ŭnh hnam dơ nuh đơ̆ng 6,7% jur oei pă 5,5%. Ƀok Rmah Khanh, thôn trơng Tung Đao tơ băt, dang ei pơ đĭ pơ lei oei đei 16 ŭnh hnam dơ nuh hin, mă lei kŭm đei lơ tơ drong jang pơm tơ lĕch ‘nao iŏk đei jơ nei, lăp vă rim ŭnh hnam hŏk pơ hrăm, tơ lĕch jang. Chi bộ păng Khŭl jang chă vei lăng kơ dih kơ pơ lei băt hơ dăh gô hơ nơ̆ng yak hơ dai tơ gŭm kon pơ lei jăh sơ đơ̆ng jang sa păng klăih đơ̆ng dơ nuh hin.

Ĭnh ‘noh 1 ‘nu  đảng viên, đei vei lăng oei hơ dai hăm 30 ŭnh hnam kon pơ lei Jrai. Tơ̆ âu đei 1 tơ drong chơt hơ iă ‘noh jĭ hơ drol sơ̆ pơ tăm tiu đei kơ jă păng đơ̆ng rŏng kơ tiu reh ‘noh đei chĕh phe kŭm chă sơ đơ̆ng đăi lơ̆m dôm sơ năm âu. Sơ năm ‘nâu sơ năm 2021, ‘meh vă kon pơ lei băt tơ mơ̆t yua trong jang sa kiơ̆ pơ tho đơ̆ng Teh đak nhen băt trong rong rơ mo, băt vei lăng ‘long cheh phe păng băt jang ƀa đak pơm liơ vă kơ đei yua. Băt ‘mơ ‘met, jang kiơ̆ tơ drong arih ‘nao nhen ‘nhŏng oh Yuăn jang sa băt jô̆ hơ len păng đei iŏk yua.

Pơ gơ̆r dơ̆ng tơ drong jang rong rơ mo, tŭn pran pơ tăm ming cheh phe, pơ̆n pơ tăm ‘long sa plei đunh sơ năm, kon pơ lei Jrai tơ̆ plei Tung Đao, xăh Ia Đreng, apŭng Chư Pưh, dêh char Gia Lai tŏk bŏk iŏk đei dôm jơ nei ‘lơ̆ng yak blŭng. Dôm tơ drong ư̆h kơ pŭn ai lơ̆m jang sa, tŏk bŏk ƀrư̆ ƀrư̆ đei hơ met ‘lơ̆ng hăm trong tơ mơ̆t jên jang pơ ‘lơ̆ng, păh lăp. Hăm tơ drong lăp đon đơ̆ng Chi bộ, khŭl jang vei lăng kơ dih kơ pơ lei păng rim ŭnh hnam kon pơ lei, đơ̆ng rŏng rim pơ yan jang, plei Tung Dao ‘noh đei dơ̆ng dôm pơ gar ƀâu phu pơ kao plei, tơ gŭm kon pơ lei tơ̆ âu hơ tŏk ‘lơ̆ng tơ drong arih sa.

 Dương Đình Tuấn: Chih

Thuem: Tơ blơ̆