Tơdrong đei jơnei kơ 'măng livestream ưh hơdrô̆ truh đơ̆ng kơ rơbou bơngai hơlen lăng, pơma dơnuh trư̆k tuyê̆n, mă oei đei bơ̆ng pang hăm đei yua 3,8 tih hlj đơ̆ng dôm anih jang mŭk drăm tơgŭm xah Ea Knuêc pơjing păng hơtŏk cham char pơtăm sâu riêng kơjăp sơđơ̆ng. 'Nou jĭ tơdrong kăp gĭt tơgŭm ăn kon pơlei hơtŏk kơjă tơmam choh pơtăm păng hơmet 'lơ̆ng đon lui đơ̆ng kon pơlei hăm tơdrong vang jang đơ̆ng jơnŭm pơgơ̆r tơring.

Ưh hơdrô̆ pơdơh ah anih tơbang tơmam drăm, tơdrong akŏm pơdah ou hlôi sơkơ̆t đon bơnôh pơ̆n tơchĕng, pơ̆n pơm jang, tơguăt hăm kon pơlei đơ̆ng kang ƀô̆ kơpal lơ̆m khei năr Đăk Lăk iŏk jang kiơ̆ pơkăp jơnŭm pơgơ̆r 2 tăl. 'Nou adoi jĭ tơdrong bơ̆ng pang hơdah hloh ăn tơdrong khŏm jang “tơchĕng tơpă, pơma tơpăt, jang tơdĕk, đei jơnei tơnăp, kon pơlei đei yua kơjăp”.