‘Nou jĭ ‘măng mă blŭng pơm lêh sâu riêng tơ̆ Đắk Lắk đei pơgơ̆r kiơ̆ kâp dêh char, đei pơgơ̆r đơ̆ng năr 15/8 truh năr 2/9 tơ̆ phương Buôn Ma Thuột, tơring Krông Pắc, phương Tuy Hòa, atŭm hăm mĭnh ƀar tơring đei hơgăt teh pơtăm sâu riêng să.

Pơm lêh đei 17 tơdrong pơgơ̆r, mă kăl ‘noh nhen: Pơm lêh blŭng a tơ̆ Cham să 10/3; Hop akŏm jang sâu riêng kơjăp ‘lơ̆ng; pơm lêh tơmam sa lăng truh sơkơ̆t hơdăh pơgơ̆r tih hloh Việt Nam hăm 102 tơmam sa đei pơm tơlĕch đơ̆ng sâu riêng; hơnih pơdă găh sâu riêng păng tơmam drăm OCOP; rim tour tơmang lăng mir pơgar sâu riêng tơklep hăm tơmang pơhiơ̆ oei sa joh ayŏ-cham char; atŭm hăm lơ tơdrong pơgơ̆r joh ayŏ, pơdă rup păng pơtrŭt mơdro sa.

Tơ̆ jơ hop akom tơbăt, bơngai chih kơtơ̆ng ang apĭnh găh tơdrong đei jơnei đơ̆ng pơm lêh hăm bơngai pơtăm sâu riêng, mă kăl tơdrong pơih să hơnih răt iŏk, hơvơn tơmơ̆t jên jang, pơtrŭt mơdro sa păng rim trong pơkăp hơlen jơnei đơ̆ng rŏng pơm lêh pơtôch.

Tơl ăn nơ̆r apĭnh ou, yă Đặng Thị Thủy, Kơ iĕng Kơdră chĕp pơgơ̆r Hơnih vei lăng Choh jang sa păng Cham char dêh char Đắk Lắk tơbăt, tơring tŏk bok tơlĕch hrơ̆p mĭnh ‘măng rim trong jang vei lăng mã kơsô̆ tơring pơtăm, hơnih tăh ‘nŭng, atŏk kơtang tơplih kơsô̆, dăr lăng đơ̆ng rŏng, iung jang choh jang sa kiơ̆ tơgoăt jang hơdoi, atŏk tơ iung pơm tơlĕch tơmam drăm, logistics păng tĕch mơdro tơ̆ lơ teh đak đe vă tơ iung pơjing jang sâu riêng atŏk tơ iung kơjăp ‘lơ̆ng.“Hơnih hlôi tơlĕch trong hơdăh vă pơchoh trong ăn Hơnih vei lăng kon pơlei dêh char rim trong jang tôm tong kơ rim hơnih jang lơ̆m vei lăng tơdrong jang sâu riêng. Nhôn tŏk bŏk pơchoh trong ăn Hơnih ve lăng kon pơlei dêh char pơjing trong pơprŏ jang atŏk kơtang tơplih kơsô̆, lơ̆m ou đei’măng iung jang 30 măng năr. Mă ƀar ‘noh jang kiơ̆ trong jang dăr lăng đơ̆ng rŏng, hrei ou ‘noh hăm bơ̆ jang ƀơk ăn mã kơsô̆ tơring pơtăm păng hơnih tăh ‘nŭng ‘noh nhôn jei atŏk kơtang, pơm lơ liơ hoei đei chă pơjĭp lơ̆m mã kơsô̆ tơring pơtăm”.

Sầu riêng jĭ tơmam drăm tơm kơ Đắk Lắk hăm teh să dang 45 rơbâu hek tar, kơsô̆ tơmam sơnăm 2025 đei 390 rơbâu tấn, kơjă tĕch tơ̆ teh đak đe ‘noh hloh 1,1 ti USD.

Kiơ̆ kơ Khŭl pơgơ̆r, lêh ưh khan lăp roi tơƀôh hơnăn Đắk Lắk đĕch mă oei lăng truh pơjing cham char tơmam drăm, pơtrŭt jang hơdai pơm tơlĕch - tĕch mơdro, sơng đei tơmơ̆t jên jang lơ̆m pơm tơlĕch, logistics păng hơtŏk tơiung tơmang pơhiơ̆ choh jang sa. Đắk Lắk tŏk bŏk ƀrư̆ ƀrư̆ hơnhăk Lêh Sầu riêng jing tơdrong jang kăl kơ teh đak, yak truh apŭng plĕnh teh.

Ƀok Trần Hồng Tiến, Kơdră chĕp pơgơ̆r Hơnih vei lăng Joh ayŏ, Đă ƀŏng lŏng tơplŏng kơdâu păng Tơmang pơhiơ̆ dêh char Đắk Lắk tơbăt, dôm tour chă tơmang lăng pơgar sầu riêng đei pơjing ưh khan lăp pơvih ăn năr lêh đĕch mă gô đei tơchĕng hơlen vă jing tơmam drăm tơmang pơhiơ̆ hơnơ̆ng, tơgop hơnhăk pơyan sầu riêng jing hơnih pơkă tơmang pơhiơ̆ rim sơnăm kơ Đắk Lắk. “Dôm tour âu ưh khan lăp pơvih ăn lơ̆m năr lêh păng đơ̆ng rŏng ou gô đei tơchĕng hơlen, hơlen lăng dơ̆ng jing dôm tour tơmang pơhiơ̆ hơnơ̆ng rim sơnăm. Rŏ lăng gô đei dôm sơnăm ưh kơ pơgơ̆r lêh, mă lei vă rim bơngai truh hăm Đắk Lắk gơh đei chă lăng truh hăm dôm pơyan pơtăm, đei lăng trong jang pơtăm, pơm tơlĕch, phĕ, tăh hơmet. Đơ̆ng rŏng lêh nhôn ‘meh vă rim pơyan sầu riêng ‘noh rim bơngai gô ƀlŏk truh păng gô năm chă tơmang pơhiơ̆ tơ̆  Đắk Lắk”.