Lơ̆m dôm hop akŏm kơchơ roi tơƀôh tơmam đei pơgơ̆r tơ̆ Buôn Ma Thuột, dôm kơdeng tơmam OCOP păng tơmam ‘lơ̆ng kơ tơring lai yơ kŭm lơ tơmoi. Mŏ Huỳnh Thị Thủy, mĭnh ‘nu bơngai răt yua tơ̆ Đắk Lắk, tơroi: Tơdrong mŏ bơngơ̆t truh mă hơdrol ‘noh jĭ ‘lơ̆ng păng băt hơdăh anih pơm tơlĕch. Mŏ rơih dôm tơmam tơ jê̆, rơđăh rơđong găh hơnih pơm tơlĕch păng mă loi ‘noh jĭ yua đơ̆ng bơngai Việt Nam pơm tơlĕch, yua kơ ‘noh kŭm jing trong vă tơgŭm tơmam Việt.

“Ĭnh ‘meh vă dôm tơmam roi ‘năr roi đei hơtŏk ‘lơ̆ng, roi tơƀôh jơ̆p jang vă kon pơlei ƀônh kơ băt hloh. ‘Ngoăih kơ ‘lơ̆ng, tơpu pơklep kŭm tôch kơ gĭt kăl, yua kơ bơngai răt yua đa  ƀôh blŭng a tơ̆ tơpu lăng ‘lơ̆ng. Tơdăh atŭm tơmam mă lei lơ kơloăi, lơ tơpu pơklep ‘lơ̆ng ‘noh gô pơm lăp hăm ‘meh vă lơ đơ̆ng rim răih tơmoi”.

Tơdrong tơplih lơ̆m tơdrong joăt răt yua âu hlôi pơm kơhret mă lei kŭm jing tơdrong ‘lơ̆ng vă rim anih pơm tơlĕch tơplih ‘nao. Lơ̆m tơdrong jang sĭt chơ choh hơbăn ao hrŭk, yă Nguyễn Thị Đượm – tơ ‘ngla pơm tơlĕch khăn hơbăn ao tanh Tây Nguyên tơ phường Buôn Ma Thuột, dêh char Đắk Lắk hlôi băt hơdăh trong vă păng hơdrin tơplih vă gơ̆t jơ̆ng tơmoi. Yă Đượm tơroi:

“Hăm tơdrong ‘meh lăp dang ei, tơmoi truh tơ̆ Buôn Ma Thuột ‘noh đe sư ‘meh hrŭk hơbăn ao kră sơ̆ păng kŭm đei tơmoi ‘noh đe ‘meh hrŭk hơbăn ao tanh sĭt cho choh kiơ̆ chăl hle hrei ‘nâu. Mă lei găh lơ đe ‘meh hrŭk hơbăn ao tanh kră sơ̆ lơ hloh. Tơdrong pran đơ̆ng bơ̆n ‘noh bơ̆n kĕ pơm lăp hăm ‘meh vă đơ̆ng tơmoi.”

Tơ̆ tơdrong jang tơmam sa, lơ anih tĕch mơdro iĕ kŭm chă trong năm ‘nao. Mŏ Dương Thị Trúc Linh, oei tơ̆ phường Tuy Hoà, dêh char Đắk Lắk – tơ ‘ngla hơnăn tơmam tăh lơ̆m pai sa Út Vũng Tàu tơmam OCOP 3 hơ nglŏng, tơroi: đon tơchĕng răt yua đĭ đei lơ tơplih. Bơngai răt ưh khan lăp bơngơ̆t truh tơdrong hiôk ƀônh, kơjă re, mă roi ‘năr roi lăng kăl tơdrong rơđăh lơ̆m pơm tơlĕch, tơdrong sơđơ̆ng kŭm nhen trong lăng ‘lơ̆ng đơ̆ng tơmam.

“Dôm tơmam tă kơ đei pơm đơ̆ng tơmam tơring, đei hla ar pơkăp rơgoh ‘lơ̆ng kơ na tôch kơ đei ‘meh vă. Trong răt yua hrei ‘nâu ‘noh sa rơgoh, mă loi ‘noh hăm tơmam ăn hơioh iĕ. ‘Nâu jĭ tơdrong tŏk pran mă nhôn tŏk bŏk akŏm”.

Dôm anih mơdro sa tih kŭm tŏk bŏk tơplih rơđăh găh tơdrong tơmoi ‘meh răt yua. Kiơ̆ kơ mŏ Châu Yến Duyên, Kŏng ti Yến sào Thành Dung, xăh Krông Pắc, dêh char Đắk Lắk: Hơdrol sơ̆, kŏng ti găh lơ pơm tơlĕch dôm kơloăi yến tôch kơ ‘lơ̆ng vă tĕch tơ̆ teh đak đe. Mă lei hrei ‘nâu, kŏng ti roi ‘năr roi bơngơ̆t truh anih tĕch mơdro lơ̆m teh đak, hơdai hăm pơm lơ tơmam vă sơng đei lơ tơmoi hloh.

“Kŏng ti hlôi tơchĕng hơlen păng ăn tơlĕch dôm tơmam lăp hăm grŭp tơmoi păh lăp, nhen dôm tơmam yến kơhnŏk iĕ pơm lơ găh kơ loăi păng ƀâu phu vă tơmoi rơih iŏk. ‘Ngoăih kơ ‘noh, nhôn oei hơtŏk tơiung tơmam yến sơ̆k, đei kơjă lăp păng ƀônh yua gơh huch, sa hloi”.

Dôm nơ̆r tơroi đơ̆ng bơngai răt yua păng anih mơdro sa ăn ƀôh, tơdrong tơklep đơ̆ng 2 păh roi ‘năr roi kơjăp. Bơngai răt yua tơgŭm tơmam Việt yua kơ tơdrong tơ jê̆, rơđăh păng sơđơ̆ng; lơ̆m kơplăh ‘noh, anih mơdro sa hơdrin tơplih ‘nao vă vei đon lui păng pơih să tơmam tĕch lơ. Tơdrong hơdai băl âu ưh khan lăp tơgŭm lơ tơmam tơring kơ dehe char Đắk Lắk đei măt tơ̆ dôm anih siêu thị tih, vang tĕch lơ̆m điện tử, mă oei tơgop pơjing hơnăn tơmam Việt roi ‘năr roi pran kơjăp.