Tơ̆ 'măng tơƀơ̆p, dôm pah hlôi pơma đam gah trong jang hơdoi vă pơih să tơdrong jang tĕch răt kiơ̆ pơkăp dơnơm hăm teh đak Trung Quốc. Jơnŭm jang Sâu Riêng Đăk Lăk adoi tơbang minh ƀar tơdrong jang hơdoi, lơ̆m noh đei: hơtŏk kĭ pơkăp jang hơdoi sơđơ̆ng đunh khei năr, pơtăl kơ jang tĕch răt kiơ̆ kơ pơyan; hơvơn anih jang mŭk drăm Trung Quốc asong ming man anih hơngeo 'măn tơmam, logistics păng pơm tơlĕch tơmam drăm tơm tơ̆ tơring; pơih să jang hơdoi pơtho bơngai jang, pơjao gah kih thuơ̆t păng tơdrong juăt vei lăng 'lơ̆ng tơmam drăm.

Đăk Lăk dang ei đei jê̆ 40.000 hec-tar sâu riêng, lơ̆m sơnăm  2025 jô̆ đei jê̆ 400.000 tơ̆n. Dêh char hlôi đei gah Trung Quốc kĭ asong ăn  269 kơsô̆ pơkăp tơring pơtăm hăm teh pơtăm să jê̆ 7.400 hec-tar; 40 anih jang 'nŭng plei 'long hơdrih păng 11 anih jang gah sâu riêng 'măn hơngeo vă tĕch ăn teh đak đe.