Pơyan ‘mi sơnăm 2026 tơ̆ Gia Lai hlôi vih hơlơ̆k dơ̆ng, dôm thoong đak hrơ̆ hroi hlôi đei đak ro dơ̆ng, rim dơnou hlôi mong đak ‘nao dơ̆ng. Mă lei, tơdrong tơtăm ưh sơđơ̆ng lơ̆m pơyan ‘mi kial jei tŏk kơtang rim năr. Tơ̆ tơring găh Pơmơ̆t dêh char Gia Lai, lơ dơnou đak nhen Tân Sơn, Ia Mlah, Đak tơnoeng B (Biển Hồ B), Ia Dréh dăh mă Ia Ring, Ia Năng… hlôi đei ƀôh đak kram lơ̆m pơnơ̆, đak ro lĕch, hư răm val hơlŏng đak, hơđang drơh man đak lah, pơchoh đak păng đak sa pơnơ̆ dơnou. Yan ou đei ƀôh găh lơ rim pơnơ̆t đak đei ming man đơ̆ng dôm ƀar jĭt sơnăm, yak hloh lơ sơnăm iŏk yoa mă lei tim mă đei tơmơ̆t jên ming hơmet pơ ‘lơ̆ng. Mĭnh ƀar dơnou dơ̆k klơ̆p, pơm ăn đak mong ưh kơ lơ; lơ hơnih hư răm pơm kơnê̆ truh tơdrong iŏk yoa păng dăr lăng hơlen đak ro lơ̆m pơyan ‘mi kial hơbŭt hơbông. Ƀok Rơ Châm Tin, Kơ iĕng Kơdră chĕp pơgơ̆r Hơnih vei lăng kon pơlei tơring Ia Grai apĭnh athei."Vă sơđơ̆ng păng vei kơjăp dơnou đak mong ‘noh lơ̆m khei năr ou kơnh hơpơi ‘meh vă hơnih bơ̆ jang găh ou kơ dêh char iung jang dăr lăng hơlen đĭ đăng dơnou mong đak, đơ̆ng rŏng ‘noh đei trong kăl vă athei kơdră kơpal tơgŭm djru kon jên ming hơmet pơ ‘lơ̆ng, sơđơ̆ng pơnơ̆t đak păng pơvih pơvăn ăn kon pơlei jang sa."

Ưh khan lăp tơ̆ tơring păh Pơmơ̆t kơ dêh char, lơ hơnih pơnơ̆t đak tơ̆ tơring Hơlĕch dêh char Gia Lai jei tŏk bŏk hư răm kơtang. Kiơ̆ đơ̆ng Kŏng ty iŏk yoa pơnơ̆t đak Bình Định, lơ̆m 63 dơnou mong đak kơ yuơ hơnih ou vei lăng hrei ou đei 9 dơnou hư răm kơtang kăl ming hơmet tĕnh koăng. Ƀok Bùi Phi Hùng, Kơ iĕng Kơdră chĕp pơgơ̆r Kŏng ty iŏk yoa pơnơ̆t đak Bình Định tơbăt. " Rim hơnih tơmơ̆t jên ming hơmet lơ kăl tơmơ̆t lơ̆m tơdrong vă tơmơ̆t jên jang đơ̆ng teh đak vă dêh char dăh mă Trung ương proh hơmet kon jên iung jang. Mưh ming hơmet đak gô pơjao ăn Kong ty vei lăng. Kon jên jang kơ Kŏng ty dang ei lăp măh ăn ming hơmet dôm hơnih hư răm iĕ, nhen ‘măng bơ̆ pơchoh đak, ‘măng hơlŏng đak, dăh mă teh tơdrŭt mĭnh jăl pơnơ̆ ou to đĕch."

Kiơ̆ đơ̆ng hơnih jang vei lăng Choh jang sa păng Cham char dêh char Gia Lai, lơ dơnou đak đei tơ iung pơjing minh man đĭ đunh pă đei sơđơ̆ng đơ̆ng tơdrong iŏk yoa lơ̆m khei ‘năr ‘mi kial roi năr roi chrih chrĕng hrei ou. Tơdrong tơmơ̆t jên jang ming man ưh khan lăp vă pơdui đunh khei ‘năr kơjăp kơ pơnơ̆t đak mă oei tơgop sơđơ̆ng ăn kon pơlei oei tơ̆ tơring păh pơbăh tơ̆ hơnăp khei ‘năr ‘mi kial hơbŭt hơbông ưh kơtom băt. Dêh char Gia Lai hlôi tơ iung pơjing trong pơprŏ jang atŏk tơ iung pơnơ̆t đak păng đak sŏ nhă rơgoh pơlei pơla jăl sơnăm 2026 - 2030, lăng truh sơnăm 2035. Lơ̆m ou, dêh char chă apĭnh athei Trung ương tơgŭm ăn kon jên vă iung jang rim tơdrong jang kăl vă ming hơmet rim pơnơ̆t, dơnou đak hlôi hư răm kơtang lơ̆m dêh char. Ƀok Cao Thanh Thương, Kơdră chĕp pơgơ̆r Hơnih vei lăng Choh jang sa păng Cham char dêh char Gia Lai tơbăt: "Tơdrong kăl hloh ‘noh kăl tơmơ̆t jên jang ming hơmet pơ ‘lơ̆ng pơnơ̆t đak. Khei năr truh ou kơnh, Gia Lai akŏm dăr lăng, tơlĕch nơ̆r apĭnh tơmơ̆t jên jang hơmet ming pơnơ̆t đak ăn tơring păh Pơmơ̆t dêh char Gia Lai vă sơđơ̆ng ăn dôm tơdrong jang, atŏk tơ iung choh jang sa. Gia Lai jei apinh Khul kơdră Teh đak păng rim hơnih tơm, hơnih jang lăng ba kơtang hloh dơ̆ng tơgŭm djru kon jên lơ ƀiơ̆ vă tơmơ̆t jang ming hơmet pơnơ̆t đak, tơgăl hăm ‘meh vă atŏk tơ iung lơ̆m jăl ‘nao."

Tơdrong tơmơ̆t jên jang ming hơmet pơ ‘lơ̆ng pơnơ̆t, dơnou đak tơ̆ Gia Lai ưh khan lăp trong jang gĭt kăl vă vei kơjăp hơnih ming man mă oei jing tơdrong jang tôch gĭt kăl vă vei lăng năng tông sơđơ̆ng ăn kon pơlei, mŭk drăm kơ kon pơlei. ‘Nou jei jing tơdrong kăl hloh vă dêh char Gia Lai kĕ iung jang tang găn hơlou hăm ‘mi kial hơŭt hơbông pơrăm, pơm sơđơ̆ng ăn atŏk tơ iung sơđơ̆ng dơ̆ng kơjăp lơ̆m chăl ‘nao.