'Nou ưh hơdrô̆ jĭ tơdrong tơm kăp gĭt 'măn choh jang xa mă oei jing tơdrong asong pơchoh đak, tơjur ƀiơ̆ tơdrong răm đơ̆ng tŏ 'mi kial hăm lơ tơring kon pơlei oei xa. Mă lei, lơ̆m khei năr tŏ 'mi kial roi năr roi ưh kơ 'lơ̆ng, lơ dơnou mong đak đei ming man đơ̆ng dôm jĭt sơnăm hơdrol ki hlôi hư răm, noh athei hơlen lăng păng pơkăp jên asong ming hơmet vă vei sơđơ̆ng ăn tơdrong mong đak hơdrol kơ pơyan 'mi kial truh.

Tơ̆ hơnăp, rim tơring, rim hơnih jang athei hơmet ming dôm hơnih răm pah ai, hơmet ming tôm dơnou mong đak. Gah đunh đai kơnh, dêh char Gia Lai hlôi chih akŏm tơdrong jang ming man pơ-'lơ̆ng dơnou mong pơchoh đak păng hơnih mong đak rơgoh ăn tơring pơsĕl đơ̆ng sơnăm 2026 - 2030, sơkơ̆t jang truh sơnăm 2035. Lơ̆m noh, tơring pơtruh nơ̆r hăm Trung ương tơgŭm jên jang vă pơtơm ming hơmet dôm dơnou mong pơchoh đak mă hlôi hư răm kơ dêh.