Đơ̆ng dang ei truh đĭ khei 7, xăh Tu Mơ Rông hơdrin jang đang tơdrong asong păng tơgŭm kon pơlei pơtăm hloh 1 triệu tơnơm ‘long cheh phe tơ̆ teh să dang 200 hek tar. Tơdrong tơm ‘noh ưh khan lăp hơtŏk teh ‘long pơtăm mă oei ƀrư̆ ƀrư̆ pơjing tơring tơmam akŏm, pơm tơdrong ‘lơ̆ng vă hơtŏk tơiung cheh phe kiơ̆ kơjă kăp gĭt. Ƀok Võ Trung Mạnh, Bí thư Đảng ủy xăh Tu Mơ Rông tơbăt, hloh 1 triệu tơnơm ‘long cheh phe đei pơtăm lơ̆m sơnăm ‘nâu ‘noh jĭ ‘nao hơyak blŭng đĕch.

Jăl jang 2026-2030, tơring tơlĕch tơdrong hơgăt tơgŭm kon pơlei pơtăm ‘nao 1.000 hek tar cheh phe; Hơdrin truh sơnăm 2030, akŏm teh cheh phe lơ̆m xăh tơchĕng hơdrol đei dang 1.588 hek tar, yak truh tơdrong hơgăt 1 ŭnh hnam kon pơlei đei tŏ sĕt hloh 1 hek tar cheh phe vă hơtŏk tơiung mŭk drăm ŭnh hnam.