Hop akŏm sơng đei tơdrong truh akŏm đơ̆ng lơ lap bơngai tang măt dôm anih tơm, anih jang, tơring, khŭl jang, anih mơdro sa păng hơp tak xăh bơ̆jang lơ̆m tơdrong jang pơm tơlĕch tĕch tơ̆ teh đak plei sầu riêng. Tơ̆ hop akŏm, dôm bơngai tang măt hlôi đei tơroi tơdrong jang pơlong lăng chih tơbăt anih jang đei; chih tơroi tơdrong hơgăt tĕch plei sầu riêng tơ̆ anih tĕch mơdro Trung Quốc; hơdai hăm pơma dơnuh găh dôm trong jang kơmăy kơmŏk, vei lăng tơring tơmam păng pơgơ̆r pơm tơlĕch kiơ̆ trong jang. Lơ nơ̆r tơgop đơ̆ng anih mơdro sa, hơp tak xăh akŏm lơ̆m dôm tơdrong mơmat tat lơ̆m kơplăh tơlĕch jang, mă loi ‘noh jĭ tơdrong hơdai chih răk păng pơm lăp hăm ‘meh vă đơ̆ng anih răt tơmơ̆t.

Ƀok Nguyễn Văn Long, Kơdră Anih jang Khoa hŏk - Kơmăy kơmŏk, Anih tơm vei lăng găh Choh jang sa păng Cham char pơma hơdăh gô hơnơ̆ng jang hơdai kơjăp hăm dôm tơring, anih mơdro sa vă jang đang tơdrong jang kiơ̆ lơ̆m răp mơ̆ng nơ̆r tơgop đơ̆ng yan âu, vei sơđơ̆ng pơm lăp hăm ‘meh vă vei lăng hai, pơm tơdrong hiôk tôch ai ăn bơngai pơm tơlĕch păng tĕch tơ̆ teh đak đe hai.