'Nou jing kơtơ̆ng ang đei Hơnih tơm Choh jang xa păng Cham char păng Hơnih tơm Kŏng an tơlĕch ah Hop akŏm pơtơm tơdrong jang pơkă, bieh um lakak tơring teh, chih măt teh, chih hla bar teh păng keh đang yư lĭu kơ teh đak chih akŏm gah teh đei pơgơ̆r tơ̆ Hà Nội. Kiơ̆ tơroi đơ̆ng Hơnih tơm Choh jang xa păng Cham char, Tơdrong jang 90 măng năr chih akŏm, pơ-'lơ̆ng kơ sơ yư lĭu kơ teh đak chih akŏm gah teh đei Hơnih tơm Choh jang xa păng Cham char păng Hơnih tơm Kŏng an pơm jang đơ̆ng năr 1/9-30/11/2025 hlôi drơ̆ng minh păng pơ-'lơ̆ng đei hloh 62,49 triu hơgăt teh lơ̆m jơ̆p teh đak.

'Nou jĭ kơ sơ yư lĭu "trŏ, tôm, 'lơ̆ng, oei yua" vă 'măn ăn tơdrong jang tơplih kơmăi kơsô̆ păng vei lăng teh gơh tơnăp. Ƀô̆ trương Hơnih tơm Choh jang xa păng Cham char Trần Đức Thắng akhan, tơdrong pơtơm pơkă, bieh um lakak teh, chih măt teh păng keh đang kơ sơ yư lĭu teh jing sơnong jang chĭnh trĭ dơnơm lơ̆m tơdrong tơplih kơmăi kơsô̆ kơ teh đak, mă kăl noh gah tơdrong vei lăng teh.