Tơ̆ Hop akŏm hơdai hăm hơlen năng rim tơdrong iŏk đei đơ̆ng tĕch phe tơ̆ teh đak đe sơnăm 2025, trong pơgơ̆r tĕch phe tơ̆ teh đak đe sơnăm 2026 păng tơ̆ hơnăp kơnh. Găh teh đak răt iŏk phe lơ̆m 02 khei blŭng sơnăm 2026, Philippines oei hơnơ̆ng jing teh đak răt iŏk phe lơ hlŏh đơ̆ng Việt Nam, iŏk đei hlŏh 55% akŏm đĭ đăng phe đơ̆ng teh đak bơ̆n tĕch tơ̆ teh đak đe, hăm 711.264 tân, tŏk 30% pơting hăm khei âu sơnăm 2025; Dơ̆ng mă 2 ‘nŏh jĭ Trung Quốc, iŏk đei dang 14% akŏm đĭ đăng phe đơ̆ng Việt Nam tĕch tơ̆ teh đak đe, hăm 178.165 tân, tŏk hlŏh 143% pơting hăm khei âu sơnăm 2025.

Tơchĕng adrol đơ̆ng khei 3 tơdrong tĕch mơdro phe đơ̆ng Việt Nam tơ̆ teh đak đe gô ƀơm ưh ‘lơ̆ng yoa đơ̆ng tơdrong tơblăh vang tơ̆ tơring Trung Đông, atŭm hăm ‘nŏh jên chơ chuĕn lơ̆m teh đak tŏk đơ̆ng 20.000- 30.000 hlak 1 tân phe; tơdrong kơhret mưh pơjei băl hăm dôm teh đak tĕh phe tơ̆ teh đak lơ nhen Thái Lan, Ấn Độ, Pakistan; phe ƀa jrăh jrai yoa đơ̆ng pơyan ƀa phang 2025 - 2026 vă truh pơyan kăt yoa tơm bơih.