Tơdrong jang đei tơlĕch jang tơ̆ xăh Krông Buk. Lơ̆m akŏp hơgăt teh să dang 150 héc-ta sầu riêng, Kŏng ti jang găh Choh jang sa Kơmăy kơmŏk ‘nao Hồng Thuận hlôi pơtăm pơlong lăng pơgar ‘long lĕch plei ưh kơ trŏ pơyan hloh 15 hek tar păng hlôi đei plei mă blŭng, tơchĕng hơdrol phĕ plei lơ̆m khei 3 âu.

Kiơ̆ chih iŏk tơ̆ pơgar, ‘long sầu riêng sơnăm mă 7 đei đơ̆ng 25-35 tơ̆ plei, trăp dang 90-110 kĭ 1 tơnơm, hơtŏ dang 12 tấn lơ̆m 1 hek tar.

Vang jang lơ̆m khŭl bơ̆jang, Phŏ Giáo sư, Tiến sĩ Nguyễn Văn Minh, Kơdră Khoa Choh jang sa, Hnam trưng Đại học Tây Nguyên tơbăt, kơjă sầu riêng plei ưh kơ trŏ pơyan tĕch tơ̆ teh đak đe dang ei dang 160 rơbâu hlak jên 1 kĭ, măk vă jê̆ 2 ‘măng pơyan tơm. Mă đơ̆ng đei plei tŏ sĕt ƀiơ̆ kơ pơyan tơm, mă lei gơnang đơ̆ng plei ‘lơ̆ng păng kơjă tĕch măk, iŏk yua mŭk drăm đơ̆ng tơdrong jang oei tôch kơ ‘lơ̆ng.

Găh păih anih mơdro sa tơmơ̆t jên jang tơdrong jang, ƀok Vũ Văn Cần, Kơdră vei lăng Kŏng ti Choh jang sa kơmăy kơmŏk ‘nao Hồng Thuận tơbăt, yak truh tơplih ‘nao tơmam, anih mơdro sa ling lang tơmơ̆t jên lơ. Mă lei, kŭm nhen lơ kơ sô̆ sầu riêng tơ̆ Đắk Lắk, yua kơ đei pơtăm hơlam hăm cheh phe, kơ su kơna ưh kơ đei asong kơsô̆ tơring pơtăm, pơm mơmat tat tih ăn hơmĕng tĕch tơ̆ teh đak đe. Tơdrong ‘nâu kăl kơ đei rim kơdră gơh kĭ ăn, set hơlen.

Kiơ̆ kơ ƀok Nguyễn Hắc Hiển, Kơdră Anih jang găh Choh pơtăm păng Vei lăng ‘long pơtăm Đắk Lắk, ‘nâu jĭ tơhlăk tơ hlĭn tôch kơ tih hăm anih jang sầu riêng kơ dêh char:

“Kiơ̆ tơdrong tơchơ̆t 38/2026 (hlôi tơlĕch ăn mă đei tam mă tơmơ̆t yua) găh vei lăng kơsô̆ tơring pơtăm ‘noh dôm hơgăt teh thoi âu ‘noh ưh kơ gơh asong kơsô̆ tơring pơtăm, yua kơ pơtăm hơlam ‘noh ưh kơ gơh. Mă dang ei, anih hơlen lăng dăr lăng ‘noh kŏng an, đe sư mơ̆t jang ‘noh tôch kơ mơmat. Bơ̆n glăi ‘noh ưh kơ gơh”.

Đơ̆ng rŏng răp mơ̆ng nơ̆r tơgop đơ̆ng anih mơdro sa păng anih joăt jang, ƀok Đỗ Hữu Huy hơlen lăng tơdrong jang sầu riêng plei ưh kơ trŏ pơyan ‘noh jĭ trong năm tôch kơ ‘lơ̆ng. Tơmam sầu riêng kơ Đắk Lắk tŏk bŏk tŏk hrĕnh păng kĕ iŏk đei truh 1 triệu tấn, akŏm lơ̆m dang 3 khei pơyan tơm gô pơm kơhret tih ăn tơdrong tĕch păng logistics. Yua thoi noh, tơdrong pơtăm sầu riêng plei ưh kơ trŏ pơyan ưh khan lăp tơgŭm hơtŏk ‘lơ̆ng iŏk yua mŭk drăm mă oei tơgop klăih dơ̆ng khei ‘năr phĕ, tơ jur pơm kơhret tơdrong chơ tơmam. Ƀok athei dôm bơngai jang khoa hŏk hơnơ̆ng vang yak hơdai hăm anih mơdro sa vă hơlen lăng plei lơ, ‘lơ̆ng, jang pơkeh trong jang ki thuơ̆t păng tơchĕng hơlen vă pơih xă tơ̆ hơnăp kơnh.

Kơdră chĕp kơ̆l dêh char kŭm tơtă truh tơdrong hơmet ‘lơ̆ng hla ar chih răk tơmam lơ̆m khei ‘năr tơplih kơsô̆ tŏk bŏk đei tŭn pran. Đắk Lắk dang ei đei hloh 30% kơsô̆ tơmam cheh phe păng sầu riêng kơ lơ̆m teh đak, mă lei jên tĕch tơ̆ teh đak đe 2 tơmam âu chih iŏk tơ̆ tơring lăp dang 23%. Yua thoi noh, Khŭl jang Sầu riêng, Khŭl jang Cheh phe kŭm hăm dôm anih mơdro sa păng anih jang vei lăng kăl kơ jang hơdai dăr lăng, tơroi kơtơ̆ng ang tôm păng trŏ ƀlep hloh găh kơjă tơmam, pơm tơdỏng ‘lơ̆ng ăn tơdrong jang vei lăng păng trong vă jang tơgŭm.

Hăm dôm tơdrong tơhlăk tơhlĭn ƀơm truh kơsô̆ tơring pơtăm, ƀok Huy athei rim anih joăt jang hơnơ̆ng akŏm, chih pơkeh hla ar hô sơ păng apĭng hăm dôm anih tơm, anih jang Trung ương vă set hơlen hơmet pơ ‘lơ̆ng:

“Găh khŭl kơdră ‘noh athei hơnơ̆ng đei nơ̆r apĭnh, athei Anih tơm vei lăng găh Choh jang sa - Cham char mơ̆t hơlen lăng. Păng mă 2 ‘noh jĭ hơmet ăn dôm tơdrong kơtơ̆ng ang tôm, dôm trong jang, mă loi ‘noh jĭ ‘măng âu ‘noh pôk rơih Quốc hội dơ̆ng, kơna tơroi hăm dôm bơngai tăh hla tơ̆ Trung ương năm, vă băt hơdrol tơdrong. Đang kơ ‘noh vă jê̆ truh hop akŏm Quốc hội, gô đei dôm nơ̆r apĭnh, athei đei tơlĕch ăn vă tơgop nơ̆r.”