Tơdrong jang ou đei iung jang tơ̆ tơring Krông Ƀŭk hăm hơgăt teh să dang 150 ha sầu riêng. Lơ̆m ou, Kŏng ty Choh jang sa Kmăi kmŏk hơgei Hồng Thuận jang pơlong năng pơm lĕch pơkao hơdrơ̆k pơyan lơ̆m 15ha păng hlôi đei plei ‘măng mă blŭng, tơchĕng hơlou gô phĕ tĕch lơ̆m khei 3. Kiơ̆ ƀôh hơdăh tơ̆ mir pơgar, dơnơm sâu riêng sơnăm mă 7 ăn plei đơ̆ng 25–35 tŏ plei, hăm trăp đei đơ̆ng 90–110 kĭ lơ̆m 1 dơnơm, hơtŏ hăm vă jê̆ 12 tân lơ̆m 1ha. Dang ei kơjă sâu riêng hơdrơ̆k pơyan tĕch tơ̆ teh đak đe dang 160.000 hlak jên lơ̆m 1 kĭ, măt hloh ƀar ‘măng pơtêng hăm khei pơyan. Hơlen tơ̆ jơ dăr lăng, Kơ iĕng Kơdră chĕp pơgơ̆r Đảng dêh char Đỗ Hữu Huy akhan, trong jang sâu riêng hơdrơ̆k pơyan ‘noh trong kăl pơtrŭt, tơgop pơm hơtŏk iŏk đei kơjăp, adoi proh hơmet pơ ‘lơ̆ng ăn khei ‘năr phĕ tĕch, pơm dă ƀiơ̆ đei lơ tơmam drăm choh jang sa tĕch mơdro hrơ̆ch mĭnh ‘măng.