Tơring kon pơlei kon kông tơ̆ apŭng groi kông Khánh Vĩnh (so) đei ƀôh đơ̆ng hơnih kơđeh, kon pơlei hơrih pơ mơ̆ng lơ̆m choh jang sa joăt joe, iĕ le, chă pơyua ăn kơdih đĕch. Tơdrong pơgơ̆r jang sa kiơ̆ trong joăt pơtăm dăh mă trong jang kơjă kăp gĭt tam mă đei pơjing. Lơ ŭnh hnam oei jang chŭn mir kiơ̆ tơdrong joăt, bu jang kơdih lơdih.

Lơ̆m tơdrong ‘noh, tơdrong jang hơdai đơ̆ng Kŏng ti răt tơmơ̆t tĕch tơlĕch tơ̆ teh đak đe plei ‘long păng tơmam đơ̆ng choh jang sa đei Ngân Nguyễn hăm 23 ŭnh hnam kon kông tơ̆ xăh Khánh Vĩnh pơtăm hloh 20 hek tar krô̆i hlôi hơnhăk ăn lơ tơdrong ‘lơ̆ng. Kŏng ti tĕch hơdrĕch, phŏng, pơgang vei lăng ‘long pơtăm, pơtho ki thuơ̆t pơtăm, hơdai hăm răt pơđĭ tơmam đơ̆ng rŏng kơ phĕ iŏk. Dôm ŭnh hnam kon pơlei đei pơhrăm ki thuơ̆t vei lăng, săy phŏng trŏ ƀlep, chih răk năr pơtăm, năr săy bơ̆n phŏng âu ki. ‘Nâu jĭ tơdrong hơdrol âu kon pơlei ưh kơ gan bơngơ̆t truh. Tơdrong hơnih tĕch mơdro vang jang hloi đơ̆ng blŭng tơgŭm kon pơlei pơm tơlĕch đei tơlĕch jang rơđăh rơđong, veh ver tơdrong ưh kơ đei plei dăh mă rơkăh lơ.

Yă Nguyễn Thị Ngân, Kơdră vei lăng Kŏng ti răt tơmơ̆t tĕch tơlĕch tơ̆ teh đak đe plei ‘long păng tơmam đơ̆ng choh jang sa đei Ngân Nguyễn roi tơbăt: Bơ̆jang kiơ̆ tơdrong jang pơtho pơhrăm trong jang găh ki thuơ̆t, đĭ đăng bơ̆n phŏng păng pơgang hơdrông tă kơ đei đe ki sư păng ‘nhŏng oh lơ̆m bơngai jang pơgar roi tơƀôh ăn kơ kon pơlei găh tơm a. Hơdai hăm tơblang hơdăh ăn kon pơlei băt ‘noh jĭ bơ̆n iŏk yua mơ̆r ‘noh gô ‘lơ̆ng thoi yơ, ăn pơkao, plei ‘lơ̆ng lơ liơ. Asong dôm tơmam rơgoh vă kon pơlei hơtŏk tơiung, kon pơlei băt păng joăt khŏm khŏm hăm tơdrong tơplih pơm tơlĕch tơmam rơgoh.

Đơ̆ng rŏng vă jê̆ 2 sơnăm tơlĕch jang hơdai, hăm tơdrong tơgŭm đơ̆ng dôm Tơdrong jang tơm teh đak, tơdrong jang âu hlôi ăn iŏk yua ‘lơ̆ng, Krô̆i bluh jing ‘lơ̆ng, yak mơ̆t lơ̆m khei ‘năr plei sơđơ̆ng. Lơ ŭnh hnam bơngai Raglai, Ê Đê hơdrol sơ̆ lăp pơtăm ƀum ƀlang, hơƀo, dang ei hlôi tơplih jing pơtăm ‘long đei kơjă mŭk drăm lơ ƀiơ̆, jên iŏk yua tŏk hloh 2 ‘măng, 3 ‘măng pơting hăm hơdrol sơ̆. Ưh khan lăp jang hơdai hăm anih tĕch mơdro, tơ̆ xăh Trung Khánh Vĩnh (hơdrol ki ‘noh xăh Khánh Trung, apŭng Khánh Vĩnh so), tơdrong jang Hơp tak xăh Choh jang sa rơgoh Khánh Trung kŭm tŏk bŏk bơ̆jang đei yua. Hơp tak xăh âu đei hloh 20 ‘nu bơngai jang vang pơgơ̆r pơm tơlĕch choh jang sa păng pơtruh dôm tơmam pơvih pơvăn pai sa, chơ chuĕn, tơmam choh jang sa, hơnih ƀĭch pơdơh ăn tơmoi tơmang lăng.

Tơdrong jang hơdai đơ̆ng dôm bơngai jang ưh khan lăp tơgŭm tơ jur jên tơmơ̆t jang blŭng mă oei tơgŭm tĕch tơmam đơ̆ng choh jang sa đei kiơ̆ grŭp, tŏk kơjă tơmam. Tơdrong kăl kơ lăng truh ‘noh jĭ hơp tak xăh âu tơklep choh jang sa hăm hơtŏk tơiung pơvih pơvăn. Pơgar pơtăm pơkao ‘long sa plei Sơn kơ yă Lê Thị Kim Thanh ‘noh 1 pơtih gia. Đơ̆ng ƀơ̆t lăp pơtăm ‘long sa plei, yă Thanh pơ̆n tơplih trong choh jang sa rơgoh hơdai hăm tơmang lăng tơpôl. Tơmoi truh lăng pơgar đei phĕ plei tơ̆ pơgar, pai sa, ƀĭch pơdơ̆h ngôi hăm ŭnh hnam bơngai kon kông kơtă hơnih, Yă Lê Thị Kim Thanh tơroi, mĭnh tơdrong pơvih pơvăn tă kơ yua đơ̆ng bơngai jang lơ̆m hơp tak xăh iŏk jang ngăl.

“Lơ̆m hơp tak xăh đei tơdrong pơvei tôch kơ jăp, pơyua ăn tơmoi truh hăm Trung Khánh Vĩnh âu gô đei pơvih ăn đĭ đăng đơ̆ng chă năm răt yua. Kơlih đơ̆ng tơdrong hơp tak xăh âu jang hơdai đĭ đăng dôm bơngai đei ‘meh vă păng tơdrong pơvih ăn tơmoi tơmang lăng, ưh kơ kĕ hơgei đei 1 ‘nu vei lăng 1 tơdrong hơdai băl.

Đơ̆ng tơdrong jang iĕ mă lei iŏk yua tih ăn ƀôh, jang hơdai ‘noh jĭ tơkhoă tơgŭm tơring kon kông tơplih trong jang sa. Ƀơ̆t kon pơlei vang hơdai băl pơgơ̆r jang sa, vang tĕch tơmam ‘noh kơjă tơmam đơ̆ng choh jang sa đei hơtŏk, jơhngơ̆m đon jang hơdai đei lơ hloh dơ̆ng. Tơplih yua kơ chă jang kơdih hơdrô̆, kon pơlei pơtơm pơm joăt hăm tơdrong pơm tơlĕch, vei sơđơ̆ng ‘lơ̆ng păng ‘meh vă tĕch mơdro.

Vang jang hơdai athei kon pơlei pơm kiơ̆ ki thuơ̆t, jang tơnăp hăm tơmam yua đơ̆ng kơdih pơm đei. Kiơ̆ đơ̆ng noh pơjing trong jang pơm tơlĕch - tĕch rơgoh, hơtŏk ‘lơ̆ng bưng ai tơmam đơ̆ng choh jang sa đei kơ tơring groi kông lơ̆m anih tĕch mơdro. Gĭt kăl hloh, dôm tơdrong jang âu tŏk bŏk pơm hơdăh ‘lơ̆ng Tơdrong jang tơm teh đak hơtŏk tơiung tơring kon pơlei kon kông ; Lơ̆m noh, hơtŏk tơiung tơdrong jang sa, pơm tơdrong jang păng hơtŏk ‘lơ̆ng iŏk yua ‘noh tơm.

Ƀok Nguyễn Ngọc Sơn, Phŏ Kơdră Anih vei lăng Hơdrĕch kon kông păng Lui khop dêh char Khánh Hòa, hơlen lăng, truh dang ei, kon pơlei ưh pă iŏk tơgŭm 1 păh mă đei pơtrŭt iŏk hơdrol, đei hơnăp jang, đơ̆ng noh pơjing tơdrong joăt pơm tơlĕch hơgei, kơjăp.

“Teh đak ưh kơ tơgŭm pơđĭ mă kon pơlei kŭm athei tơgop, iŏk hơdrol 1 păh vă bơ̆jang kiơ̆ tơdrong jang. Ĭnh akhan ‘noh jĭ trong ‘lơ̆ng hloh vă tơplih đon hlôh vao, mưh kon pơlei đei jên kơdih lơ̆m noh, đe sư gô đei tơnăp hloh hăm mŭk tơmam đei tơgŭm. ‘Nâu kŭm jing trong hrĕnh hloh vă kon pơlei hlôh, pơm tơ ‘ngla păng tơklep hăm tơdrong jang pơm tơlĕch.”

Tơring groi kông dêh char Khánh Hòa tŏk bŏk đei tơplih ‘lơ̆ng lơ. Ƀơ̆t anih mơdro sa, hơp tak xăh păng kon pơlei vang jang hơdai ‘noh tơdrong hơtŏk tơiung choh jang sa ưh pă jing tơdrong tơroi hơdrô̆ kơdih. Vang hơdai băl jang sa hlôi jing trong năm hơdai, tơgŭm kon pơlei kon kông yak tŏk pơm tơ ‘ngla jang sa, ƀrư̆ ƀrư̆ hơtŏk tơiung kơjăp ‘lơ̆ng.