Lơ̆m dôm năr ‘nâu, rim pơgê tơ̆ tơnŏk duk Phan Thiết, phường Phan Thiết, dêh char Lâm Đồng đei lơ ƀato yâu ka mât dơ̆ng. Rim năr tơnŏk duk sơng iŏk đei truh dôm jĭt tân ka hơdang, mă lơ ‘nŏh ka nŭk. Mă đơ̆ng yă tĕch ưh gan măk, yă tĕch lơ tơ̆ tơnŏk duk lăp jur tŏk đơ̆ng 10 - 15 rơbâu hlak 1 kĭ, mă lei yoa jang đei ka lơ, kơna kon pơlei jang xa oei đei iŏk yoa sơđơ̆ng đĕch.

Đơ̆ng blŭng sơnăm truh dang ei, Tơnŏk duk Phan Thiết sơng iŏk đei hlŏh 15.000 tân ka hơdang đei rôp yâu tơ̆ đak dơsĭ atăih kơjih đak dơsĭ đơ̆ng 15 - 20 hải lý. Ka hơdang âu tơgŭm ăn kon pơlei jang ka đei dơ̆ng kon jên vă răt tơmam pơ ‘nhŏ ăn tơdrong arih, tơlĕch jên jang xa dơ̆ng, đei dơ̆ng đon adrin năm yâu ka tơ̆ đak dơsĭ, vei kơjăp tơring jang ka đơ̆ng sơ̆.