Anih vei lăng kon pơlei phường Đông Gia Nghĩa ăn tơbăt tơring hlôi pơjing khul jang hrĕnh păng tơlĕch lơ trong jang tang găn jĭ kiơ̆ tơdrong hơgăt. Kiơ̆ đơ̆ng hơlen năng, đei 40 tŏ nhŭng kơ unh hnam ƀok Mai Thanh Sự tơ̆ kueng kơphô̆ Đồng Tiến đei jĭ, ưh ‘mĕh xa, lĕch ƀre ƀrônh tơ̆ hơkar păng lôch ưh băt yoa kiơ.

Đơ̆ng rŏng iŏk đei tơdrong set hơlen jĭ, khul kơdră tơring hlôi chĕng găn tơring đei jĭ, pơgơ̆r soh hŭt đĭ đăng nhŭng jĭ kiơ̆ tơdrong hơgăt, atŭm hăm ‘nŏh hơmet pơ ‘lơ̆ng anih rong, pruih pơgang pơlôch pơrang jĭ tơ̆ hơdrong, săy vôi. Hơdai hăm tơdrong tang găn jĭ, phường Đông Gia Nghĩa oei hơtŏk tơdrong dăr lăng tơ̆ tơring đei jĭ păng dôm tơring jŭm dăr; roi tơbăt, pơtho ăn kon pơlei jang kiơ̆ dôm trong rong kon tơrong sơđơ̆ng ‘lơ̆ng, ưh gơ̆h chơ chuĕn, tĕch mơdro dăh mă ket ƀuh nhŭng jĭ.