Tơ̆ xăh Đam Rông 1, dêh char Lâm Đồng, ‘nhŏng Phạm Văn Hội jĭ 1 lơ̆m dôm kon pơlei jang chŭn mir iung jang hơdrol hơnhăk găr mắc ca lơ̆m pơm tơlĕch mă ‘lơ̆ng. Đơ̆ng tơdrong tĕch plei hơdrih pơmơ̆ng lơ̆m bơngai mơdro, sư pơ̆n tơmơ̆t jên jang răt kơmăy pleh kơđoh, kơmăy sơ̆k păng pơjing hơnăn "Mắc ca Hội Dung". Tơmam găr mắc ca sơ̆k kơ anih jang iŏk đei OCOP 3 hơ nglŏng, hơdai hăm jang hơdai răt iŏk tơmam đơ̆ng lơ ŭnh hnam kon pơlei lơ̆m tơring vă pơm tơlĕch, tĕch mơdro tơ̆ dôm anih tĕch mơdro teh nhen Hà Nội păng pơlei tơm Hồ Chí Minh. Kiơ̆ kơ ‘nhŏng Hội, ‘meh tơmam năm hơtăih ‘noh athei vei lăng ‘lơ̆ng hloi đơ̆ng pơgar truh ti bơngai răt yua:

"Pơm tơlĕch mă ‘lơ̆ng ‘noh jĭ jô̆ hơlen đơ̆ng ƀơ̆t mă đơ̆ng tơ̆ pơgar klĕp truh tơdrong hơtuch đei truh bơngai răt yua. Tơdrong tơm đơ̆ng nhôn ‘noh jĭ tơmam ‘lơ̆ng năm hơdrol vă đei năm jrŭ, đei năm hơtăih”.

Đơ̆ng tơdrong jang đơ̆ng ‘nhŏng Hội, pơm tơlĕch ‘lơ̆ng tŏk bŏk jing trong năm đei lơ anih mơdro sa, hơp tak xăh păng anih pơm tơlĕch tơ̆ Lâm Đồng rơih iŏk vă hơtŏk ‘lơ̆ng kơjă tơmam đơ̆ng choh jang sa đei. Dang ei lơ̆m dêh char đei hloh 500 anih pơm tơlĕch, tăh hơmet hăm akŏm kŏng suơ̆t hloh 1,53 triệu tấn 1 sơnăm, pơm tơdrong ‘lơ̆ng vă tơmam đơ̆ng choh jang sa đei kơ tơring pơm lăp hăm ‘meh vă đơ̆ng rim anih tĕch mơdro ‘nao păng pơih să anih tĕch mơdro tơ̆ teh đak đe.

Kiơ̆ kơ mŏ Nguyễn Thị Thùy Minh, tơ ‘ngla 1 anih pơm tơlĕch tơmam đơ̆ng choh jang sa đei tơ̆ phường Lâm Viên – Đà Lạt, pơm tơlĕch mă ‘lơ̆ng tŏk bŏk pơih ăn trong năm kơjăp ăn tơmam đơ̆ng choh jang sa đei kơ tơring. Ưh khan lăp hơmet pơ ‘lơ̆ng tơdrong rơkăh tơmam đơ̆ng choh jang sa đei lơ̆m pơyan phĕ iŏk, bơ̆jang pơm tơlĕch oei tơgŭm hơtŏk kơjă tơmam, pơdui đunh jơ năr vei lăng, pơm dơ̆ng tơdrong jang ăn bơngai jang tơring păng pơtrŭt pơjing trong jang hơdai đơ̆ng pơm tơlĕch truh tĕch mơdro.

“Mơ̆t lơ̆m pơyan jang ‘noh đei ƀôh lơ tơmam đơ̆ng choh jang sa đei kơna nhôn tĕch ưh kơ tom. Yua thoi noh kơsô̆ tơmam đơ̆ng choh jang sa đei ‘noh sư gô đei hư. Yua thoi noh anih jang nhôn rơih kơmăy kơmŏk sơ̆k kro âu vă nhôn iŏk yua đei đunh năr hloh, mă tơmam kŭm đei lơ hloh, ‘lơ̆ng hloh”.

Tơpă yan âu ăn ƀôh, kŭm 1 kơloăi tơmam đơ̆ng choh jang sa đei mă mưh đei pơm tơlĕch gô hơtŏk lơ kơjă tĕch mơdro, hơdai hăm tơgŭm bơngai pơm tơlĕch kơchăng hloh tơ̆ hơnăp dôm tơdrong tơplih đơ̆ng anih tĕch mơdro. Vă pơm hơtŏk ‘lơ̆ng ăn anih jang pơm tơlĕch tơmam đơ̆ng choh jang sa đei, dêh char Lâm Đồng hlôi tơlĕch trong vă jang hơtŏk tơiung pơm tơlĕch ‘nhot, plei ‘long jăl jang 2026-2030. Tơdrong tơm truh sơnăm 2030, kơsô̆ ‘nhot plei ‘long kiơ̆ đơ̆ng pơm tơlĕch ‘lơ̆ng iŏk đei dang 30% akŏm kơsô̆ tơmam, ƀrư̆ ƀrư̆ hơnhăk kơmăy kơmŏk pơm tơlĕch jing tơdrong ‘lơ̆ng jang tŏk gĭt kăl kơ mŭk drăm choh jang sa tơring.

Kiơ̆ kơ ƀok Phan Nguyễn Hoàng Tân, Kơdră Anih vei lăng găh Choh jang sa păng Cham char dêh char Lâm Đồng, pơm tơlĕch ‘lơ̆ng ‘noh jĭ tơkhoă hơtŏk ‘lơ̆ng kơjă tŏk, hơtŏk tơdrong pơjei păng pơih să anih tĕch mơdro tơ̆ teh đak đe ăn tơmam đơ̆ng choh jang sa đei kơ tơring. Ƀok Phan Nguyễn Hoàng Tân pơma hơdăh:

“Vă hơtŏk ‘lơ̆ng kơjă pơjei đơ̆ng anih jang kŭm nhen hơtŏk tơiung anih tĕch mơdro, mă loi ‘noh jĭ tĕch tơ̆ teh đak đe ‘noh bơ̆n kăl athei băt hơdăh dôm tơring joăt pơtăm, pơm tơlĕch tơklep hăm tơdrong pơkăp ‘lơ̆ng. Hơdai hăm ‘noh hơtŏk kơsô̆ pơm tơlĕch lơ̆m anih choh jang sa vă pơm đei kơjă tŏk păng hơtŏk ‘lơ̆ng tơdrong kĕ pơjei đơ̆ng anih jang”.

Đơ̆ng dôm anih pơm tơlĕch lơ̆m ŭnh hnam truh dôm anih mơdro sa tơmơ̆t jên jang ‘nao, pơm tơlĕch ‘lơ̆ng tŏk bŏk pơm đei tơdrong tơplih pran kơtang lơ̆m đon tơchĕng hơtŏk tơiung choh jang sa tơ̆ Lâm Đồng. Rim tơmam đơ̆ng choh jang sa đei đơ̆ng rŏng kơ pơm tơlĕch ưh khan lăp tơgop hơtŏk ‘lơ̆ng iŏk yua ăn kon pơlei, tơjur hiong răm đơ̆ng rŏng phĕ iŏk mă oei hơtŏk ‘lơ̆ng tơdrong pơjei, pơih să anih tĕch mơdro. ‘Nâu jĭ trong năm gĭt kăl vă tơmam đơ̆ng choh jang sa Lâm Đồng hơtŏk kơjă păng hơtŏk tơiung kơjăp ‘lơ̆ng.