Pơgê hrôih đơ̆ng rŏng kơ 'mi kial, Hnam man 'nao đei klo kăn mŏ Nguyễn Thị Xuân tơ̆ plei Hòa Mỹ, xăh Xuân Cảnh pơm hơmet bơbŭng hăm kơsô̆ jên 35 triu, đơ̆ng chă mong măi lơ sơnăm păr đĭ bơbŭng. Ưh tom sơ 'ngon, klo kăn măr sư vang hơmet hnam, tơjră dơ̆ng tơnăr oei đei vă pơm anih pĕng tŏ 'mi. Tơdrong tơgŭm truh mưh mŏ iŏk đei nơ̆r tơroi gô đei tơgŭm 10 triu hlak jên đơ̆ng tơring vă pơ̆ng hơmet bơbŭng hnam: “Kơplăh dang ei ‘nŏh athei răt gŏch, pơm hơmet bơbŭng 2 tŏ hnam kơpal hơdrol. Pơm hơmet 2 tŏ hnam kơpal vă đei anih oei xa ‘mơ̆i, đang kơ ‘nŏh dar deh jang xa dơ̆ng, đei jên ‘nŏh pơm dơ̆ng, ưh đei ‘nŏh gô ning mônh pơm bưh.”

Ưh lăp hnam kon pơlei đĕch, anih jang, trong nơnăm gĭt kăl kŭm pŭ lơ tơdrong răm ‘năi. 81 tŏ jrăng điên tơgơ̆, vă jê̆ 400.000 ‘nu bơngai ưh đei unh điên. Anih jang unh điên athei vă jê̆ 900 ‘nu bơngai, hlŏh 50 tŏ gre, klăih song khul jang prăt măng. 3 năr đơ̆ng rŏng, unh điên đei dơ̆ng tơ̆ jơ̆p tơring găh Hơlĕch. Ƀok Trần Văn Thuận – Kơdră chĕp kơ̆l Công ty Unh điên Đắk Lắk ăn tơbăt: “Tơdrong jang đơ̆ng nhôn đei tơlĕch ‘nŏh lơ̆m 3 năr athei chô̆ dơ̆ng unh điên ăn đĭ đăng kon pơlei tơ̆ tơring găh Hơlĕch.”

Tơ̆ dôm Hnam trưng, hlŏh 70 hnam hŏk, 26 lăm hŏk păr bơbŭng, pơchăh kơmĭl. Yă Nguyễn Hồng Huệ, Hiê̆u trơng Hnam trưng Mầm non Xuân Quang 1, 1 lơ̆m dôm hnam trưng hiong răm lơ tơ̆ xăh Phú Mỡ tơroi, ưh đei gô nơ̆r pơtho, thây kô, mĕ ƀă hŏk tro kŭm hăm ƀô đô̆i - công an tơ̆ tơring pơgơ̆r hơmet ming pơ 'lơ̆ng hiong răm tôch hrĕnh: “Krao akŏm khul jang đơ̆ng khul linh Ƀô đô̆i, Công an truh tơgŭm ăn hnam trưng, athei adrin hơmet mă ‘lơ̆ng cham char vă đe kon mon năm hŏk gơ̆h sơđơ̆ng 'lơ̆ng.”

Kơmăng kial hơbŭt hơbang pơm hiong răm tôch lơ, truh pơgê, khul jang tơgŭm hơdrol tơ̆ dôm tơring lơ̆m dêh char Đắk Lắk đei măt hloi tơ̆ dôm pơlei pơla hiong răm lơ. Khul linh kanh sat tang găn, pĭt unh xa păng dŏng tơgŭm ăn cano, thŏng nan kơmăy, chĕp ba tơmam tơgŭm, truh chơ iŏk kon pơlei păng tơgŭm pơm hơmet hnam.

Thượng tá Phạm Ngọc Vinh, Phŏ Kơdră Anih kanh sat tang găn pĭt unh xa păng dŏng tơgŭm kơ Công an dêh char Đắk Lắk tơroi: “Đơ̆ng rŏng kơ kial hơbŭt hlŏh, khul linh tang găn, pĭt unh xa păng dŏng tơgŭm dêh char jang hơdoi hăm dôm khul ƀơm truh ăn kơhrĕng ‘nu kăn ƀô̆, gre, kơmăy kơmŏk năm truh tơ̆ dôm tơring vang tơgŭm ăn kon pơlei. Blŭng a ‘nŏh akŏm bơngai hơmet pơ ‘lơ̆ng dôm anih teh hơlih, ‘long păk găn trong, preh hnam hŏk, tơgŭm ăn dôm bơngai oei xa hơdrô̆ hơdrăn, dôm unh hnam đei kŏng, dôm hnam păk, păr bơbŭng vă pơm hơmet ăn kon pơlei đơ̆ng rŏng kơ ‘mi kial.”

Kiơ̆ kơsô̆ chih jô̆ blŭng a, hiong răm lơ̆m dêh char hlŏh 2 rơbâu ti hlak jên. Dêh char tơlĕch hlŏh 80 ti tơgŭm hloi ăn dôm unh hnam đei bơngai lôch, hnam păk, hnam păr bơbŭng; atŭm hăm ‘nŏh krao akŏm khul linh công an, ƀô đô̆i năm truh tơ̆ rim pơlei vă pơ̆ng hơmet bơbŭng, pơm hơmet hnam pơgia, pơtruh măh mai đak yoa, pơgang, tang găn jĭ.

Kơdră vei lăng kon pơlei dêh char Đắk Lắk Tạ Anh Tuấn pơma hơdăh: “’Nâu jĭ tơdrong pơlong hăm khul kơdră tơring 2 tăl lơ̆m tơdrong tang găn sar bar tŏ ‘mi kial kơnê̆. Nhôn ƀôh Khul kơdră pơgơ̆r tơring 2 tăl, ƀât oei đei tơdrong krê âu jang tơtom ƀiơ̆, jang kơtă tơ̆ tơring, đei yoa ‘lơ̆ng ƀiơ̆. Hrei ‘nâu oei akŏm jơhngâm hơmet pơ ‘lơ̆ng trong gre, unh điên, anih jang pơgang vă găn ưh ăn đei tơdrong jĭ, atŭm hăm ‘nŏh tơgŭm ăn unh hnam đak lơ̆p, păr bơbŭng vă jăh đei tơdrong arih xa sơđơ̆ng.”

Ƀât truh dăr lăng kơtă  tơ̆ tơring, Phó Thủ tướng Mai Văn Chính chih iŏk đon kơchăng, bơ̆ jang hrĕnh đơ̆ng Đắk Lắk, mă loi jĭ tơdrong chông tơlĕch kon pơlei lĕch đơ̆ng tơring krê hơmơt tôch tơtom, khul linh công an, ƀô đô̆i, khul jang unh điên năm hloi tơ̆ dôm tơring đei hiong răm đơ̆ng rŏng kơ ‘mi kial: “Tang măt ăn Khul kơdră teh đak, Thủ tướng teh đak inh pôk pơ ư dêh char Đắk Lắk, kơchăng, adrin bơ̆ jang tang găn ‘mi kial kơsô̆ 13. Inh ƀôh khul jang unh điên, công an, ƀô đô̆i jur tơgŭm vă gơ̆h ret hŭt ‘long păk, hơmet ming hnam oei ăn kon pơlei, dôm hnam trưng, iĕm jang tôch ‘lơ̆ng. Athei iĕm chă hơlen năng, chih jô̆ mă tôm, mă trŏ tơdrong hiong răm vă đei nơ̆r roi tơƀôh, athei tơlĕch jên vă hơmet pơ 'lơ̆ng hiong răm.”

‘Mi kial kơsô̆ 13 đei tôch hrĕnh, phă pơrăm tôch dêh, jĭ tơdrong nol hlôi băt hơdrol đơ̆ng hrôih hăm rim anih jang chinh trĭ păng kon pơlei Đắk Lắk. Kiơ̆ đơ̆ng tơdrong nol ‘nŏh, đon rơgei, jang gơ̆h đơ̆ng khul kơdră pơgơ̆r tơring 2 tăl hlôi đei ƀôh hơdăh, ‘nŏh jĭ  tơdra trŏ rim tơdrong; bơ̆ jang tôch kơchăng, hơbĕch hơbal, tơtil hăm kon pơlei. ‘Nâu jĭ 1 tơdrong hơiă vă hơnơ̆ng tưk tơiung, khŏm yak hlŏh rim tơdrong nol nai tơ̆ jăl trong pơjing 1 khul kơdră pơgơ̆r tơring jang rơgei, đei yoa./.