Hop akŏm pơma hơdăh, Tơdrong jang “1 xăh 1 tơmam” (OCOP) păng tơdrong chă tơmang lăng tơ̆ tơring tơrang hlôi jing jơhngâm pran gĭt kăl tơgŭm “rou tơiung” tơdrong ‘lơ̆ng đơ̆ng joh ayŏ kơ dŏ xoang, cham char, kon bơngai tơ̆ rim pơlei pơla. Kiơ̆ kơ ‘nŏh, tơdrong jang hlôi pơm tơplih pran lơ̆m tơdrong choh jang xa, đơ̆ng jang răh rai iơ iĕ jing jang hơdoi pơm hơtŏk kơjă tơmam; pơjing đei tơring pơtăm pơm tơmam sơđơ̆ng ‘lơ̆ng, hơtŏk tơdrong iung jang xa, tưk tơiung tơdrong jang tơ̆ tơring tơrang, pơih đei tơdrong ‘lơ̆ng lơ̆m tơdrong jang xa ăn kon pơlei kon kông păng drŏ kăn tơ̆ tơring tơrang. Dang ei lơ̆m teh đak đei hlŏh 17.300 tơmam OCOP, hlŏh 600 trong chă tơmang lăng choh jang xa kŭm hăm vă jê̆ 400 anih chă tơmang lăng tơ̆ tơring đei chih tơbăt.

Tơ̆ Hop akŏm, dôm bơngai tang măt akhan: Tơ̆ hơnăp tơdrong athei ‘nao găh  atŏk tơiung mŭk drăm rơgŏh ‘lơ̆ng, tơplih hăm kơmăy sô̆, tơjur ƀiơ̆ kơchơ̆t ‘mê̆ ‘mach păng pơm lăp hăm tŏ 'mi kial tơplih, athei đei lơ hơyak jang ‘lơ̆ng, trong jang ‘nao ƀiơ̆ vă taŏk tơiung tơmam OCOP păng chă tơmang lăng tơ̆ tơring. Tơdrong jang OCOP păng chă tơmang lăng tơ̆ tơring đơ̆ng 2026–2030 đei hơmĕng jing hơyak tŏk pran lơ̆m trong hơmet ming trong jang mŭk drăm tơ̆ tơring, vang tơgop pơm hơtŏk iŏk yoa, tưk tơiung tơdrong arih ăn kon pơlei, atŭm hăm ‘nŏh vei kơjăp tơdrong jŏh ayŏ kơ dŏ xoang păng cham char ‘lơ̆ng rŏ tơ̆ pơlei pơla Việt Nam.