‘Năr 28/8, tơ̆ Đắk Lắk, Anih pơtrŭt choh jang xa kơ teh đak jang hơdoi hăm Anih vei lăng choh jang xa păng cham char pơgơ̆r pơma đam găh “Trong jang atŏk tơiung hơdai vă pơtăm păng tĕch mơdro plei gui yoăn kơjăp ‘lơ̆ng”. Lơ̆m teh đak hrei ‘nâu đei hlŏh 10.000ha gui yoăn, plei đei đơ̆ng 190.000 – 220.000 tân 1 sơnăm, akŏm lơ tơ̆ Tây Nguyên. Dang 80% plei đei pơm hơmet, tĕch tơ̆ teh đak đe, iŏk đei hlŏh 170 triu USD 1 sơnăm.

Mă lei, anih jang âu oei tơjră hăm lơ tơdrong nol nhen yŏng ưh đei ‘lơ̆ng hơnơ̆ng, ki thuơ̆t jang tam gan ‘lơ̆ng, tơdrong pơm tơlĕch tơmam ưh kơ ‘lơ̆ng ‘năi păng trong jang hơdoi tam mă kơjăp. Phŏ Kơdră Anih pơtrŭt choh jang xa kơ teh đak Hoàng Văn Hồng akhan: Gui yoăn đei lơ tơdrong ‘lơ̆ng vă tŏk jing anih jang kơ ti đô la, mă loi tơ̆ dôm anih tĕch mơdro nhen tơ̆ EU, Mi, Úc, Hàn Quốc. Vă tơgĕch iŏk tơdrong ‘lơ̆ng ‘nâu, jang xa choh pơtăm athei hrơ̆ch ‘lơ̆ng păng chih hơdăh hơnăp jang tơ̆ rim tơdrong, đơ̆ng noh gơ̆h bơ̆ jang ‘lơ̆ng kiơ̆ trong pơm hơtŏk kơjă tơmam păng pơih xă anih tĕch mơdro tơ̆ teh đak đe.