Pơma đam sơng đei lơ bơngai juăt jang, anih tĕch mơdro, HTX păng kon pơlei jang chŭn mir truh đơ̆ng dôm dêh char Đắk Lắk, Gia Lai păng Lâm Đồng. Tơ̆ hop akŏm, dôm bơngai tang măt oei pơma nuh găh ki thuơ̆t jang, iŏk yoa kơmăy kơmŏk rơgei păng tơdrong ƀơk ăn kơsô̆ tơring pơtăm vă pơyoa ăn tơdrong tĕch mơdro tơ̆ teh đak đe. Lơ nơ̆r apinh, đon tơtăm đơ̆ng kon pơlei jĭ tơdrong gĭt kăl vă anih pơtrŭt choh jang xa hơnơ̆ng hơmet ming trong jang tơ̆ hơnăp kơnh.

Kiơ̆ trong jang tŏk truh sơnăm 2030, rim anih pơtrŭt choh jang xa lơ̆m teh đak vă akŏm jang lơ̆m 7 grŭp tơdrong tơm, lơ̆m noh đei tơplih hăm kơmăy sô̆, atŏk tơiung choh jang xa rơgoh, pơtho ăn kon pơlei choh jang rơgei păng pơih xă trong jang hơdoi teh đak hăm kon pơlei, vang tơgop bơ̆ jang đei đon pơhnŏng “choh jang xa rơgŏh – tơring tơrang ‘lơ̆ng rŏ - kon pơlei jang chŭn mir rơgei” tơ̆ tơring Tây Nguyên.