Tơdrong chih hơlen ăn ƀôh, tơdrong pơtăm kaphê hrou hăm sâu riêng tơ̆ Đăk Lăk pơyua pơhlom 800 triu hlj 1 ha, pơtăm hrou hăm măk ka đei yua jê̆ 400 triu hlj 1 ha, lơ hloh pơtêng hăm pơtăm hơdrô̆ kaphê đei yua pơhlom 80 triu hlj đĕch 1 ha. Mă lei, tơdrong jang ou adoi oei tơjră hăm tơdrong tơgar gah kơchơ̆t 'lơ̆ng, đak păng tơpoh pơrang hơdrông pơrăm.

Lơ̆m 'măng akŏm tơroi tơbang, Anih jang ou tơroi gah trong ruih Israel mong ƀiơ̆ đak, 'măn kam ƀiê̆n vei lăng kơchơ̆t 'lơ̆ng lơ̆m teh, iŏk yua mã QR vă băt tơm a la chă păng kơmăi sơkơ̆t hơdah plei sâu riêng đum, vă hơtŏk tơdrong 'lơ̆ng tang găn tơdrong răm lơ̆m choh jang xa.