Tơ̆ hơla ‘năr tŏ ƀa đum glơch tơ̆ kơdơ chŭn plei Mỹ Xuân 1, xăh Hòa Thịnh, ‘nhŏng Nguyễn Hải Triều hăt hot kŭm hăm 3 ‘nu bơngai jang huơ̆r kơmăy yuă, yuăt 5 sao ƀa đum đĭ bơih. ‘Nhŏng Triều ƀlŏk dơ̆ng, ‘măng ‘mi tih đak lơ̆p tôch kơ dêh ƀơ̆t khei 11/2025 hlôi hoch jroh kơ ŭnh hnam sư vă jê̆ đĭ pơđĭ mŭk tơmam păng ƀa hơdrĕch ăn pơyan phang hloi. Đơ̆ng rŏng kơ choh hơmet ming chŭn na, ŭnh hnam đei tơgŭm 30 kĭ ƀa hơdrĕch, 50 kĭ phŏng vă rei pơtăm ming. Đơ̆ng rŏng hloh 3 khei rei tơđăh, vei lăng, 5 sao ƀa dang ei đĭ truh năr kăt yuă.

“Hnam nhôn jang 5 sao chŭn, iŏk yua hơdrĕch ƀa BĐR999 păng Đài Thơm. Plei sơnăm ‘nâu tŏk dang 20% pơting hăm pơyan jang hơdrol. Pơma atŭm ‘noh jĭ đei dang 400kĭ lơ̆m 1sao (500m2-PV).  Yuă hoăt đang ‘noh iŏk lê̆ dang jĭt ƀao vă lê̆ kơ sŏng, uơ oei dơ̆ng tĕch vă kla jên phŏng, jên pơgang păng kŏng jang”.

Tơ̆ kơdơ chŭn na Hòa Tân Đông, phường Đông Hòa, ƀok Trần Văn Hữu kŭm hăm 2 ‘nu kon sư kŭm tŏk bŏk hăt hot yuă văt jê̆ 1 mâu ƀa đum. Pơyan ƀa phang sơnăm ‘nâu, gơnang đơ̆ng tŏ ‘mi hiôk păng vei lăng ‘lơ̆ng, plei ƀa tŏk lơ. Ƀok Hữu tơbăt:

“Tŏ ‘mi sơnăm ‘nâu hiôk, iŏk yua ƀa pơyan ‘nâu ‘noh đei, jô̆ pơhlom dang 300–350 kĭ 1 sao, tŏk dang 20% pơting hăm pơyan jang hơdrol. Hnam nhôn jang 1 mâu ‘noh kŭm đei 3,3 - 3,5 tấn ƀa. Ŭnh hnam chhôk ‘nă dêh”.

Ƀok Nguyễn Thanh Minh – Kơdră vei lăng Hơp tak xăh Choh jang sa Hòa Đồng (xăh Hòa Thịnh) tơbăt, đơ̆ng rŏng ‘măng ‘mi tih đak lơ̆p khei 11/2025, găh lơ ŭnh hnam kon pơlei hiong răm tôch kơ dêh ƀơ̆t ƀa hơdrĕch păng mơ̆r hoch jroh đĭ, ƀơm ưh kơ ‘lơ̆ng truh choh jang sa pơyan phang. Bơ̆jang kiơ̆ athei đơ̆ng Anih vei lăng kon pơlei dêh char Đắk Lắk păng gơnang đơ̆ng tơdrong tơgŭm đơ̆ng dôm bơngai đei jơhngơ̆m ‘lơ̆ng, hơp tak xăh hlôi tơtom pơtruh 126 tấn hơdrĕch ƀa ‘lơ̆ng, hơdai hăm pơgơ̆r pơhrăm ki thuơ̆t ăn kon pơlei. Gơnang đơ̆ng noh, pơyan jang sơnăm ‘nâu iŏk đei lơ; hơp tak xăh kŭm kơchăng răt iŏk, tơgop sơđơ̆ng anih tĕch ăn kon pơlei.

“Blŭng pơyan, hơp tak xăh hlôi jang hơdai hăm Anih Choh pơtăm păng vei lăng ‘long pơtăm dêh char Đắk Lắk (tơring 6) pơgơ̆r pơhrăm ăn kon pơlei găh ki thuơ̆t tang găn hơdrông sa, pơtho vei lăng ƀa vă iŏk đei lơ hloh. Hrei ‘nâu, hơp tak xăh hơnơ̆ng jang hơdai hăm khŭl jang pơtrut choh jang sa kơ xăh, Lăm jang mŭk drăm xăh păng jang hơdai hăm 7 anih mơdro sa hlôi răt iŏk ƀa, tơgŭm anih tĕch ăn kon pơlei. Hăm pơyan jang đơ̆ng rŏng dơ̆ng, hơp tak xăh gô jang hơdai hăm Anih vei lăng kon pơlei xăh Hòa Thịnh pơjing trong tơlĕch jang hơnơ̆ng tơgŭm hơdrĕch ăn kon pơlei kiơ̆ Tơdrong tơchơ̆t 112/2024/NĐ-CP.”

Pơyan ba phang sơnăm 2025–2026, xăh Hòa Thịnh păng phường Đông Hòa rei pơtăm vă jê̆ 4 rơbâu hek tar ƀa. Gơnang đơ̆ng tơgŭm hơdrĕch păng 1 puăt phŏng mơ̆r, kon pơlei hlôi tơtĕnh tơiung ming choh pơtăm. ƀa bluh jing ‘lơ̆ng plei jô̆ pơhlom đei 300–400 kĭ 1 sao. Tơ̆ hơnăp hơmơt kơ ‘năr tơplih ưh kơ ‘lơ̆ng, rim tơring kŭm kơchăng tơlĕch trong jang yuă hrôih vă tơjur tŏ sĕt ưh kơ pŭn ai. Ƀok Huỳnh Mỹ Phong, Kơdră Anih vei lăng kon pơlei phường Đông Hòa, dêh char Đắk Lắk tơbăt:

“Vă vei sơđơ̆ng jơnei ăn pơyan ƀa phang sơnăm ‘nâu, bơ̆jang kiơ̆ trong jang kăl “đei đăi tơ̆ hnam pôm păi kơ lê̆ đak lơ̆p tơ̆ chŭn”, Anih vei lăng kon pơlei phường hlôi athei rim hơp tak xăh tơlĕch trong jang yuă ƀa ăn kon pơlei mưh ƀa đum đei 85–90%, tang găn tôch ai tơdrong ƀa đum hơlŭng tơ̆ chŭn na. Hơdai hăm ‘noh, kŭm vă veh ver kơ ‘mi grơ̆m ưh kơ ê pơm ăn ƀa păk, liĕt, ƀa gô chăt kơtă hloi tơ̆ chŭn na”.  

Đơ̆ng dôm kơdơ chŭn na hlôi đei đak lơ̆p, dang ei kơmâu dreng hơ gŭt hơgăt plei hlôi đei dơ̆ng tơ̆ dôm xăh păih Hơlĕch dêh char Đắk Lắk; ưh khan lăp hơnhăk ba đon chơt hiă jang đei ƀa lơ mă oei tơƀôh hơdăh tơdrong kĕ chĭu păng kĕ tơiung kơjăp đơ̆ng kon pơlei jang chŭn mir. Tơdrong mơ̆t jang tơtom đơ̆ng khŭl kơdră, hơp tak xăh păng rim khŭl lĭnh tơgŭm hlôi pơm hơnih gơning kơjăp vă kon pơlei yak hloh pơmat tat vă đei 1 pơyan ƀa phĭ tơnŏ.