Tơ̆ bro bri lơ̆m tơring Măng Đen, dêh char Quảng Ngãi, sơ̆ găh apŭng Kon Plông dêh char Kon Tum, khul Vei lăng bri tơring 6, găh Hơnih vei lăng bri dêh char Quảng Ngãi tŏk bŏk tơmơ̆t flycam lơ̆m bơ̆ jang vei lăng năng tông bri păng tang găn ŭnh sa bri, pĭt ŭnh sa bri. Lăp đơ̆ng rŏng mĭnh ƀar ‘măng chă kơtĭt ‘noh jĭ kmăi tĕnh koăng păr, phĭn pơtruh kơtă rup ăn hơnih chĕp pơgơ̆r. Đơ̆ng rơvơ̆ng plĕnh hơtăih 100met Flacam tơgŭm ăn khul vei lăng bri lăng ƀôh hơdăh mĭnh bro bri pơtăm, tơtom ƀôh dôm bro bri hơmơt unh sa kơtang dăh mă dôm gru đe vă pơrăm bri brăh.

Pơtêng hăm trong chă pơtrui dăr joang hmă, flycam tơgŭm ăn dă ƀiơ̆ tơhoach jơ ‘năr, jơhngơ̆m năm jang. Mưh đei ƀôh hơmơt ŭnh sa, kang ƀô̆ vei lăng bri gơh ăn kmăi păr hơdưr, hơlen hơdăh găh bro bri, găh ŭnh sa bri kơtang lơ liơ, đơ̆ng noh tơlĕch trong jang iung jang hơmet tĕnh koăng hloh. Ưh khan lăp tơgŭm ăn tang găn hơlou ŭnh sa, pĭt ŭnh sa bri, flycam oei tơgŭm ăn ƀôh hrôih rim tơdrong đe chă muih roh soh bri pơm mir, đe koh glăi ‘long dăh mă đei ƀôh dôm tơdrong hlĭch lơ̆m bro bri hơnih vei lăng.

‘Nhŏng Huỳnh Tú, Bơngai jang vei lăng bri găh Hơnih vei lăng bri tơring 6, găh Hơnih vei lăng bri dêh char Quảng Ngãi tơbăt, flycam jĭ kmăi kmŏk tơgum ăn tôch ‘lơ̆ng hơ iă, mă lei năm pơtrui kơtă oei jing tơdrong kăl hloh:“Rim năr, bơngai jang vei lăng bri iung jang tơdrong vei lăng năng tông bri, dăr joang năm pơtrui. Mă lei, tơdrong iŏk yoa flycam tơgŭm ăn mưh đei bri bri ŭnh sa, nhôn mă hơlen băt trong năm truh jăl hloh, tĕnh koăng hloh. Lơ̆m bơ̆ jang năm pơtrui dăr lăng, dôm bro bri đe muih koh pơm mir jei đei ƀôh hrôih hloh”.

Atŭm hăm iŏk yoa kmăi kmŏk, bơ̆ jang pơrô̆ pơrôp pơtho khan păng iung jang hơdoi hăm kon pơlei jei đei rim hơnih tơ-‘ngla bri lăng kơjăp. Hơnih vei lăng năng tông bri Măng Đen, Công ty Lâm nghiệp Kon Plông dang ei vei lăng hloh 9.800 hektar bri, pơdor lơ̆m 12 bro bri, lơ̆m mă khul vei lăng bri lăp đei 12 ‘nu kang ƀô̆, bơngai jang.

Ƀok Trần Văn Thanh, Kơdră chĕp pơgơ̆r Hơnih Vei lăng năng tông bri Măng Đen tơbăt, groi teh să, khul kơtoei kơna hơnih ling lang lăng tơdrong pơrô̆ pơtho khan jĭ trong jang kăl hloh. Lơ trong jang hơdăh đei tơlĕch ăn vă tơgŭm ăn kon pơlei ƀônh hlôh vao lơ̆m tơdrong vei lăng năng tông bri, tang găn ŭnh sa bri, pĭt ŭnh sa bri. Gơnơm lơ loh, tơdrong pơm glăi khôi luơ̆t vei lăng bri păng tơdrong hơmơt ŭnh sa bri đei vei lăng năng tông ‘lơ̆ng.“Hơnih vei lăng bri Măng Đen tơ iung pơjing hla kak tang găn ŭnh sa bri, ăn khul vei lăng tang găn ŭnh sa. Dôm bro hơmơt đei ŭnh sa bri, nhôn pơ̆ng kơƀang tơbăt ưh soh ŭnh vă kon pơlei băt ‘nou jĭ bro hơmơt tơt hloh. Kon pơlei ‘meh vă chong, soh mir na tơjê̆ bri ‘noh chă pơm tơnglăng hơdrol, đơ̆ng rŏng ‘noh tơroi ăn hơnih vei lăng bri. Lơ̆m mă noh, hơnih gô pơtho ăn kon pơlei chă soh lơ liơ mă trŏ lăp”.

Tơ̆ Công ty vei lăng Bri choh jang sa Kon Plông, bơ̆ jang vei lăng bri đei tơlĕch lơ trong jang, tơ iung pơjing trong jang kiơ̆ bro bri păng ăn khul bơ̆ jang chă gak tơ̆ dôm bro bri hơmơt ŭnh sa kơtang, mă kăl ‘noh tơdrong tang găn ŭnh sa bri, pĭt ŭnh sa bri. Ƀok Nguyễn Văn Huynh, Kơdră chĕp pơgơ̆r Hơnih jang Kih thuơ̆t kơ Công ty Bri choh jang sa Kon Plông tơbăt, hơnih oei tơmơ̆t jên jang ăn rim hơnih dăr lăng ŭnh sa bri, răt ăn sơmel, kmăi pĭt păng lơ kmăi kmŏk kăl hloh vă đei ƀôh hrôih găh ‘nhui, pla ŭnh đơ̆ng hơtăih. Gơnơm tang găn hơlou, đơ̆ng blŭng sơnăm truh dang ei, hơgăt teh bri kơ yuơ Công ty vei lăng tim mă đei ‘măng ŭnh sa bri ayơ.“Rim hơnih găh hơnih ou iung jang ‘lơ̆ng tơdrong jang tang găn hơlou ŭnh sa, pĭt ŭnh sa lơ̆m pơyan phang. Đơ̆ng noh, hlôi dăr lăng hơlen dơ̆ng đĭ đăng kmăi kmŏk, rim trong jang vă tơtom chă răt, tơmơ̆t dơ̆ng, tơgŭm ăn bơ̆ jang tang găn ŭnh sa bri, pĭt ŭnh sa bri pơyan phang”.

Kiơ̆ chih jô̆, đơ̆ng blŭng sơnăm truh dang ei, Quảng Ngãi đei 3 ‘măng ŭnh sa bri tơ̆ rim tơring Bờ Y, Sơn Hà păng Mỏ Cày. Rim ‘măng ŭnh sa bri mă kăl tơ̆ bri ‘long pơtăm, khul jang kơtă tơtom pĭt kĕ.

Hrei ou lơ̆m dêh char Quảng Ngãi đei hloh 900.000 hektar bri. Dêh char hlôi atŏk kơtang iŏk yoa kmăi kmŏk tơdra hơdrol, flycam, rup vê̆ tinh; adoi hơmet ăn tôm khul jang, gre kmăi kmŏk kiơ̆ trong “4 kơtă, 3 iung jang” vă hơmet pơ ‘lơ̆ng tơtom dôm tơdrong sar bar. Ƀok Nguyễn Khánh Ngọc, Kơ iĕng Kơdră Hơnih vei lăng Bri dêh char Quảng Ngãi tơbăt:"Teh đak vei lăng rim hơgăt bri kơdrơ̆ng păng bri choh jang sa. Hăm tơ-‘ngla bri khul 1 ‘noh ŭnh hnam, rim bơngai, kon pơlei păng dôm hơgăt teh bri uơ oei tim mă pơjao kơ yuơ Hơnih vei lăng kon pơlei tơring vei lăng. Đơ̆ng blŭg pơyan phang, rim hơnih hlôi hơmet pơ ‘lơ̆ng Khul chĕp pơgơ̆r, adoi tơ iung pơjing trong jang hơdoi ƀar păh rim khul jang đei ƀơm truh”.