VOV4.Bahnar - Gơ nơm jang ‘lơ̆ng tơ drong tang găn jĭ Covid-19, Công ty TNHH jang chĕh phe 15 găh Quân khu 5, Anih tơm vei lăng khul linh tĕh đak đei anih jang tơ̆ xăh Cư Dliê Mnông, apŭng Cư M’gar, dêh char Dak Lak vei kơ jăp tơ drong jang xa, tĕch mơ dro đei yoa, pơm ‘lơ̆ng tơ drong arih xa ăn công nhân păng bơ ngai jang.

Công ty jang Cheh phe 15 jĭ anih jang kơ Khul linh đei hơ năp jang atŏk tơ iung mŭk drăm păng vei lăng sơ đơ̆ng tĕh đak. Dang ei anih âu pơ gơ̆r jang hlŏh 800 ha cheh phe, 300 ha cao su, chă tơ drong jang ăn hlŏh 1.200 ‘nu công nhân, bơ ngai jang, lơ̆m nŏh hlŏh 170 ‘nu công nhân bơ ngai kon kông.

Hăm trong jang “choh jang xa, atŏk tơ iung păng vei sơ đơ̆ng” mưh bơ̆ jang kiơ̆ “2 tơ drong jang tơm”, khei ‘năr âu ki, Công ty jang Cheh phe 15 hlôi hơ tŏk păng jang kiơ̆ ‘lơ̆ng dôm trong jang tang găn jĭ Covid-19, atŭm hăm ‘nŏh vei kơ jăp tơ drong jang xa. Anih jang năng kăl truh dôm tơ drong krê jĭ tơ pŏh blŭng a. Kăn ƀô̆, linh, công nhân, bơ ngai jang athei pơm kiơ̆ tơ drong hơ găt tang găn jĭ; đei set hơ len jĭ Covid-19 kiơ̆ đơ̆ng test hrĕnh mă ưh ‘nŏh set hơ len hăm RT-PCR kiơ̆ khei. Đĭ đăng gre, tơ mam mât lĕch lơ̆m anih jang, hnam kơ măy đei pruih pơ gang pơ lôch pơ rang jĭ ngăl... Gơ nơm thoi nŏh, dôm hnam kơ măy, dôm khul jang vei lăng chĕh phe oei bơ̆ jang hơ nơ̆ng.

Khul linh quân y khăm hơ len jơ hngâm pran păng chih tơ roi găh jơ hngâm jăn adrol kơ mât tơ̆ anih jang

Mŏ H’Duân Niê, công nhân tơ̆ Công ty jang Cheh phe 15 tơ roi: Ƀơm kơ nê̆ đơ̆ng jĭ Covid-19 pơm ăn unh hnam mŏ tơ ƀâp lơ mơ mat tat, mă lei anih jang tơ tom pơ lung, tơ gŭm vei lăng ‘lơ̆ng tơ drong arih xa păng pơ tho tơ ƀôh trong tang găn jĭ kơ na rim bơ ngai sơ đơ̆ng jơ hngâm jang kĕh rim tơ drong đei tơ lĕch: “Găh tang găn jĭ ‘nŏh inh jang kiơ̆ tôm 5K. Găh công ty sư tơ gŭm tôm tơ mam, kơ plăh mơ mat tat hlŏh ‘nŏh tơ gŭm phe, măm, ƀoh păng tơ gŭm jên khei vă đei jên răt tơ mam pơ ‘nhŏ ăn tơ drong arih xa rim năr”.

‘Nhŏng Ma Văn Tân, bơ ngai iŏk vei rong chĕh phe tơ̆ Công ty jang Cheh phe 15 ‘nŏh tơ roi: “Gơ nơm đơ̆ng công ty pơ ngơ̆t ăn bơ ngai jang, lơ̆m pơ yan jĭ âu kŭm đei ƀet vắc xin vă bơ ngai jang sơ đơ̆ng jơ hngâm bơ̆ jang păng hơ nơ̆ng kiơ̆ công ty truh ning mônh”.    

Đại uý, linh juăt jang Nguyễn Thị Thu Ngân, vei lăng Khul 3, ăn tơ băt, truh dang ei, đĭ đăng công nhân lơ̆m khul đei ƀet vắc xin tang găn jĭ Covid-19 ngăl bơih. Gơ nơm jang ‘lơ̆ng tơ drong tơ roi tơ băt, kăn ƀô̆, công nhân, bơ ngai jang hlôh vao trong tang găn jĭ, adrin ưh ăn jĭ tơ pŏh ƀơm kơ nê̆ truh tơ drong jang xa, tĕch mơ dro kơ Công ty păng tơ drong jang kơ rim bơ ngai.

“Hăm anih jang nhôn, đơ̆ng đei jĭ ‘nŏh đĭ đăng bơ ngai jang lơ̆m anih đei vei lăng sơ đơ̆ng ‘lơ̆ng ngăl. Păng đei yoa đơ̆ng tang găn jĭ đei anih jang akhan tôch ‘lơ̆ng, ưh ăn đei tơ drong ưh sơ đơ̆ng jô̆ hloi hăm đe công nhân kŭm nhen tơ̆ tơ ring. Kăl loi anih jang vei lăng 'lơ̆ng chĕh phe, tơ̆ pơ gar chĕh phe kŭm pơm kiơ̆ tơ drong dơ̆ng jang hơ tăih băl, ưh đei ngôi akŏm kơ na tơ drong jang vei rong chĕh phe oei bơ̆ jang 'lơ̆ng thoi hmă đĕch”.

Công ty jang Chĕh phe 15 ƀet vắc xin tang găn jĭ Covid-19

Kiơ̆ Đại tá Phạm Xuân Thảnh, Kơ dră chĕp kơ̆l Công ty TNHH jang Cheh phe 15, gơ nơm tơ lĕch jang hrơ̆ch lơ trong jang tang găn jĭ, mă loi ‘nŏh bơ̆ jang kiơ̆ tơ drong hơ găt 5K đơ̆ng Anih tơm vei lăng jang pơ gang, truh dang ei Công ty jang ‘lơ̆ng tơ drong tang găn jĭ, vei kơ jăp tơ drong jang xa, tĕch mơ dro. 

“Dôm khul jang nhen Khul jang mŭk drăm vei lăng tĕh đak, dôm khul choh jang đei grŭp tang găn jĭ Covid-19 hơ nơ̆ng bơ̆ jang rim năr, băt hơ dăh rim tơ drong vă roi tơ băt găh tơ drong tang găn jĭ păng tơ drong jĭ tơ pŏh tơ̆ tơ ring. Găh anih jang ‘nŏh ưh đei gô chang, gơ nang yoa đơ̆ng anih jang kơ pal tơ gŭm. Hăm anih jang oei hơ nơ̆ng vei kơ jăp tơ drong jang xa, tĕch mơ dro thoi adrol ki. Hơ drô̆ 9 khei sơ năm 'nâu, nhôn jang xa đei lơi hlŏh 3 ti, lơ hlŏh 1,5 'măng pơ têng hăm trong vă jang lơ̆m sơ năm 2021. Lơ̆m khei 'năr oei tôch mơ mat tat âu mă lei anih jang Đảng, Khul kơ dră chĕp kơ̆l, khul tơ pôl, bơ ngai jang adrin tôch ai vă vei kơ jăp tơ drong jang xa".

Công ty jang Chĕh phe 15, Quân khu 5 jĭ anih jang ‘lơ̆ng 2 tơ drong jang tơm: tang găn jĭ hai, jang xa tĕch mơ dro đei yoa ‘lơ̆ng hai, chă tơ drong jang păng vei sơ đơ̆ng tơ drong jang ăn bơ ngai jang.

Tuấn Anh: Chih

Dơ̆ng: Tơ blơ̆