VOV4.Bahnar - Kơsơ̆ năr 19/9, kiơ̆ jơ tơring ( ‘nŏh jing pơgê năr 20/9 kiơ̆ jơ Việt Nam) tơ̆ Hơnĭh bơ̆ jang kĕch mang Hơnĭh tơm La Habana, Bí thư mă blŭng Dơnŏ anĭh chĕp pơgơ̆r Trung ương Đảng Cộng sản Cuba, Kơdră chĕp pơgơ̆r Tĕh đak Cộng hòa Cuba Miguel Díaz-Canel hlôi pơm tơm pơm lê̆h sơng Kơdră chĕp pơgơ̆r Tĕh đak Nguyễn Xuân Phúc. Lăp đơ̆ng rŏng pơm lê̆h sơng, Kơdră chĕp pơgơ̆r Tĕh đak Nguyễn Xuân Phúc hămBí thư mă blŭng Dơnŏ anĭh chĕp pơgơ̆r Trung ương Đảng Cộng sản Cuba, Kơdră chĕp pơgơ̆r Tĕh đak Cộng hòa Cuba Miguel Díaz-Canel chĕp kơ̆l khŭl tang măt Kơdră kơpal ƀar tĕh đak pơgơ̆r pơma đam.

Tơ̆ pơma đam, ƀar ‘nu kơdră chĕp pơgơ̆r drơng mĭnh nơ̆r lơ̆m khei năr kơnh ƀar păh hơnơ̆ng atŏk kơtang pơvei jang chĭnh trĭ ‘moi kiơ̆ ăn Khŭl rim kơdră năm ngôi dĭh băl, vei kơ jăp hơnơ̆ng ‘lơ̆ng hơ iă, atŏk kơtang jang hơdoi ‘lơ̆ng hơ iă, pơ đĭ Hop akŏm hơlen bơ̆ jang kơ ƀar păh Đảng, Dơnŏ anĭh bơ̆ jang Khŭl kơdră Tĕh đak, lăng hơlen dĭh băl trong jang chĭnh trĭ ƀar păh ƀar Dơnŏ anĭh tơm jang tơpôl, Pơma dơnŭh trong bơ̆ jang kơ ƀar păh ƀar Khŭl lĭnh. Kơdră chĕp pơgơ̆r Tĕh đak Nguyễn Xuân Phúc bơnê kơ rim kơdră chĕp pơgơ̆r kơpal, Dơnŏ anĭh tơm vei lăng jang Pơgang păng hơnĭh jang pơgang Cuba mă đơ̆ng ƀet bơ̆ng lơ̆m tĕh đak tim mă keh đang mă lei hlôi plang ăn, pơtho tơbăt, tĕch ăn kmăi kmŏk pơm tơlĕch vaccine tang găn jĭ Covid-19 đơ̆ng Cuba ăn Việt Nam. ‘Nau mĭnh trong ƀô̆h hơdăh jơhngơ̆m đon tơgŭm djru tơtom mă Cuba ling lang ‘măn ăn kơ Việt Nam nhen nơ̆r pơma đơ̆ng Kơdră chĕp pơgơ̆r Fidel Castro “Kơ yuơ Việt Nam, Cuba drơ̆ng nơ̆r plang ăn pham sĕch bơ̆n hloi”.

Tơblơ̆ nơ̆r: Amazưt