VOV4.Bahnar - Kơ dră teh đak Nguyễn Xuân Phúc hlôi đei ‘măng pơ ma điên thoăi hăm Bí thư mă mônh Anih chĕp kơ̆l pơ gơ̆r Trung ương Đảng Cộng sản Cu-ba, Kơ dră teh đak Cu-ba Miguel Díaz-Canel, pơ ma dơ nuh găh trong vă jang, trong jang hơ nơ̆ng hơ tŏk loi dơ̆ng tơ drong pơ vei tơ bôl joăt joe gĭt kăl đơ̆ng 2 Đảng, teh đak păng kon pơ lei 2 teh đak. Kơ dră teh đak Nguyễn Xuân Phúc tơ ƀôh đon chhôk hơ iă ‘măng mă blŭng pơ ma điên thoăi hăm ƀok Miguel Díaz-Canel kiơ̆ lơ̆m kơ chư̆k jang ‘nao; hơ len lăng tơ drong pơ vei đơ̆ng 2 teh đak hơ nơ̆ng hơ tŏk tơ iung pran kơ tang ư̆h kơ mơ̆ng jĭ hơ buh. 2 kơ dră chĕp kơ̆l hlôi pơ ma hơ dăh tơ drong 1 jơ hngơ̆m đon ư̆h kơ đei tơ plih đơ̆ng Việt Nam păng Cu-ba, ling lang tơ gŭm băl lơ̆m rim tơ drong, drơ̆ng nơ̆r hơ tŏk loi dơ̆ng jang hơ dai păng tơ roi băl tơ drong hlôh vao lơ̆m kơ plăh pơ jing Chủ nghĩa xã hội tơ̆ 2 teh đak. Kơ dră Miguel Díaz-Canel pơ ma hơ dăh Cu-ba tôch kơ lăng kăl jang hơ dai vắc-xin hăm Việt Nam, hơ drin đơ̆ng dang ei truh hơ tuch sơ năm 2021 pơ truh lơ vắc xin Abdala bơ̆ng jĭ Covid-19 đơ̆ng  Cu-ba păng gô ăn bơ ngai joăt jang năm pơ jao kơ măy kơ mŏk pơm tơ lĕch vắc xin ăn Việt Nam.

Thuem: Tơ blơ̆