VOV4.Bahnar - Tơ roi đơ̆ng Kŏng ti jang ŭnh điên Dak Lak, khei ‘năr tơ jê̆ âu, Anih vei lăng tơ moi kơ Kŏng ti tơm jang ŭnh điên tơ ring tŏk bŏk iŏk đei 9 ‘măng krao điên thoăi đơ̆ng tơ moi tơ roi găh tơ drong đei apĭnh hre jên ŭnh điên đơ̆ng dôm kơ sô̆ điên thoăi chĕp ti. Tơ̆ Dak Lak, hlôi đei bơ ngai krao điên thoăi apĭnh jên hre truh 50 triệu hlak jên, đe sư khan yua đơ̆ng ŭnh điên chạm tơ̆ rŏng kŏng tơ, tơ hli tơ dăh ư̆h kơ nôp jên ‘noh gô kăt ŭnh điên. Kiơ̆ đơ̆ng hơ len lăng hơ dăh, ‘nâu adoi jing dôm ‘măng krao điên thoăi hơ lĕnh hơ năn bơ ngai jang ŭnh điên vă hơ lĕnh pơ dăr.

Anih jang ŭnh điên tơ tă kơ tơ moi athei kơ chăng, ‘nĕ kơ lê̆ dôm bơ ngai hơ lĕnh pơ dăr. Tơ dăh đei đei krao điên thoăi apĭnh jên, tơ moi kăl kơ tơ roi hloi ăn kơ tổng đài 19001909 vă tơ tom hơ met pơ ‘lơ̆ng. Tơ moi iŏk tơ drong tơ roi đơ̆ng dôm kênh ƀlep nhen SMS, email, website kơ ŭnh điên, tổng đài 19001909; păng ư̆h kơ kla jên ŭnh điên ăn kơ bơ ngai hlĭch dăh mă gơ̆ih jên mư̆h tam băt hơ dăh.

Thuem: Tơ blơ̆