VOV4.Bahnar - Kiơ̆ Anih pơ gơ̆r jang tang găn jĭ COVID -19 dêh char Dak Lak, lơ̆m ‘năr 10/8, lơ̆m dêh char đei dơ̆ng 36 ‘nu bơ ngai tơ pŏh pơ rang jĭ SARS –CoV-2 tơ̆ 6 apŭng păng plt Buôn Ma Thuột. Krê loi tơ̆ thôn 7 xăh Vụ Bổn, apŭng Krông Pach ‘nao ƀôh 1 anih jĭ, hăm 17 ‘nu bơ ngai F0 ưh băt tơ pŏh đơ̆ng yơ. Dang ei pơ lei âu hlôi đei pơ vang găn. Anih jang pơ gang Dak Lak hlôi chă đei kơ hrĕng ‘nu bơ ngai F1.

Mĭnh kơ sô̆ anih jang hơ păh tơ mam yoa kăl ăm khul bơ̆ jang tơ̆ dôm anih gak hơ len jĭ COVID kơ xăh Vụ Bổn

Vă pơ vih ‘lơ̆ng ăn kon pơ lei lơ̆m tơ ring pơ vang găn, xăh Vụ Bổn hlôi pơ jing 1 grŭp pơ truh tơ mam păng roi tơ băt kơ sô̆ điên thoăi grŭp âu ăn kon pơ lei vă kon pơ lei krao mưh đei tơ drong kăl. Kŭm hăm ‘nŏh xăh oei athei dôm pơ lei chih măt dôm unh hnam tơ nuh, unh hnam mơ mat tat hơ mơt kơ pơ ngot lơ̆m khei ‘năr pơ vang găn ưh ăn yak mât lĕch vă đei trong tơ gŭm tơ tom.

Tơ drong jang set hơ len jĭ hrĕnh, vă chă bơ ngai jĭ đei xăh pơ gơ̆r jang tôch ai

Tơ drong dăr hơ len, chă bơ ngai jĭ, chĕng găn tơ ring vă hơ met đĭ jĭ kŭm đei xăh tơ lĕch jang tôch pơ nĕh. Jô̆ truh ‘năr dơ̆ng 10/8, dêh char Dak Lak đei 446 ‘nu bơ ngai tơ pŏh pơ rang jĭ SARS–CoV-2, lơ̆m nŏh oei hơ met jĭ ăn 415 ‘nu, 30 ‘nu bơ ngai jĭ đĭ klăih bơih păng 01 ‘nu bơ ngai lôch. 

Dơ̆ng: Tơ blơ̆