VOV4.Bahnar - Jang kiơ̆ nơ̆r pơrô̆ jang đơ̆ng Grŭp jang Kmăi ŭnh hơyŭh Việt Nam (EVN) lơ̆m 2 khei 7 - 8/2021, Kŏng ty ŭnh hơyŭh Dak Lăk jang kiơ̆ tơ jur jên iŏk yua ŭnh hơyŭh ăn vă jê̆ 150.000 ‘nu tơmoi tơ̆ apŭng Cư Kuin păng pơlei tơm Buôn Ma Thuột, dôm tơring kăl jang kiơ̆ ăn oei hơtăih dĭh băl kiơ̆ Nơ̆r athei jang kiơ̆ 16 đơ̆ng Khŭl kơdră Tĕh đak vă tang găn jĭ Covid-19.

Lơ̆m ‘măng mă 4, Kŏng ty Ŭnh hơyŭh Dak Lăk jang kiơ̆ tơgŭm djru hlŏh 12 ti 500 triu hlak jên jang kiơ̆ tơjur kơ jă ŭnh hơyŭh, tơjur jên iŏk yua ŭnh hơyŭh ăn tơmoi. Kiơ̆ kơ ‘nŏh tơdrong tơjur au ‘nŏh đei: Tơjur 15% jên iŏk yua ŭnh hơyŭh (tim mă jô̆ jên thuê̆ VAT) ‘moi kiơ̆ hla bơar kla ăn kon jên iŏk yua ŭnh hơyŭh ăn tơmoi iŏk yua trŭh 200 kWh/khei; tơjur 10% jên iŏk yua ŭnh hơyŭh (tim mă jô̆ jên thuê̆ VAT) ‘moi kiơ̆ hla bơar kla ăn kon jên iŏk yua ŭnh hơyŭh ăn tơmoi iŏk yua hlŏh 200 kWh/khei. Ƀok Hà Văn Chương-Kơ iĕng Kơdră chĕp pơgơ̆r Kŏng ty Ŭnh hơyŭh Dak Lăk tơbăt, jang kiơ̆ ăn oei hơtăih dĭh băl tang găn jĭ Covid-19 kiơ̆ nơ̆r athei jang kiơ̆ 16 đơ̆ng Thủ tướng Tĕh đak, rim bơngai jei oei lơ̆m hnam ngăl kơna tơdrong iŏk yua ŭnh hơyŭh jĭ tôch kơ lơ. Tơdrong tơjur jên ŭnh hơyŭh ăn tơmoi ‘noh kăl hlŏh lơ̆m khei ‘năr đei jĭ hơbŭh pơrăm. Dơnŏ anĭh au tŏk bŏk iung jang kơtang hăm rim hơnĭh bơ̆ jang anai chĭh hơnăn rim tơmoi vă tơgŭm djru tơ jur kon jên iŏk yua ŭnh hơyŭh kiơ̆ tơdrong tơchơ̆t.

Tơblơ nơ̆r: Amazưt