VOV4.Bahnar – Mă ‘nao pơm jang, chŏng Anih jang y tê̆ bô̆k vih tơ̆ Đăk Lăk hlôi đei yua tơnăp lơ̆m tơdrong vei lăng jơhngơ̆m jăn kon pơlei lơ̆m khei năr pơrang jĭ COVID-19 hơbuh hli, mă hăt noh tơ̆ lơ tơring tŏk bŏk oei pơm kiơ̆ pơkăp oei tơklăh lơ̆m tơpôl vă tang găn păng tơjră pơrang jĭ.

Ƀôh hơving măt, gleh lap, ƀok Y Dhôk Êban, tơ̆ thôn 7 (pơlei Dhă Prông), xăh Cư Êbur, plei tơm Buôn Ma Thuột hăt hot athei kon drŏnglo năm tơ̆ hnam hơkŭm tơpôl kơ pơlei – anih mă Anih jang y tê̆ bô̆k vih kơ xăh oei pơm jang vă khăm hơmet jĭ. Tơ̆ âu, đơ̆ng rŏng kơ khăm, ƀak sih ƀôh băt ƀok tŏk huyêt ap (170/90) noh hlôi tom axong pơgang păng pơtho ƀok pơm kiơ̆ tơdrong kăl hơlen jơhngơ̆m jăn tơ̆ hnam. Ƀok Y Dhôk Êban ăn tơbăt, đơ̆ng dôm năr adrol, ƀok ƀôh lơ̆m hơkâu jăn gleh lap, ưh kơ ‘lơ̆ng, mă lei kơyuơ pơlei tŏk bŏk oei pơm kiơ̆ pơkăp pơvei vă tang găn păng tơjră pơrang jĭ COVID-19 noh ƀok tam mă gơh năm khăm tơ̆ hnam pơgang. Kơtơ̆ng kon drŏnglo akhan, xăh ‘nao pơjing khul jang y tê̆ bô̆k vih jang kơtă tơ̆ pơlei noh inh năm truh khăm hơlen tơdrong jĭ: “Inh ƀôh ƀônh hiôk noh inh năm tơ̆ âu chă khăm, Anih jang y tê̆ xăh Cư Êbur truh tơ̆ pơlei ăn kon pơlei kon kông tơ̆ âu găn hloh tơnap tap đơ̆ng pơrang jĭ hơbuh, ‘năr âu inh duh hmach bơnê kơ đe ‘nhŏng oh năm jang tơ̆ âu tơgŭm kon pơlei tôch tơnăp”. 

Anih jang Y tê̆ bô̆k vih xăh Cư Êbur đei tơ iung pơjing đơ̆ng năr 15/9 hăm 6 kang ƀô̆, y ƀak sih. Anih jang đei ‘măn ăh hnam hơkŭm tơpôl thôn 7 (pơlei Dhă Prông) păng pơm jang măng năr hloi, hăm dôm tơdrong jang tang găn păng tơjră pơrang jĭ COVID-19 tơ̆ hnam; tơlĕch hơlen SARS-CoV-2; ƀet vaccine bơ̆ng COVID-19 păng khăm hơlen jơhngơ̆m jăn kon pơlei, hơmet ming jĭ tơtom dôm tơdrong jĭ hmă.

Mă ‘nao pơm jang, mă lei anih jang hlôi tơtom khăm hơmet jĭ ăn kon pơlei lơ̆m khei năr pơm kiơ̆ pơkăp pơvei kơyuơ tơring đei lơ bơngai ƀơm jĭ Covid-19. Ƀak sih  Y Suôm Ênuol, Kơdră Anih jang Y tê̆ bô̆k vih xăh Cư Êbur ăn tơbăt: “Nhôn khăm hơmet jĭ ăn kon pơlei dôm tơdrong jĭ hmă, mưh hlăm noh nhôn ‘nhăk tơ̆ hnam pơgang tơm. Tơlĕch jang tơ̆ âu noh ƀônh lơ̆m khei năr pơrang jĭ COVID âu hơbuh hli noh kon pơlei chơt hơ iă păng hnam hơkŭm tơpôl thôn 7 âu jing anih tơm kơ pơlei pơla hơnơ̆ng đei lơ kon pơlei mơ̆t lĕch noh xô̆ hơ̆k. Kon pơlei năm khăm tơ̆ âu, ba axong pơgang, ba năm truh hnam đe xư iŏk đak muh test renh kiơ̆ xơkơ̆t ăn kon pơlei vih vơ̆t”

Tơ̆ thĭ xăh Buôn Hồ, tơring oei hơbuh hli găh pơrang jĭ COVID-19 kơ dêh char Đăk Lăk, Anih jang y tê̆ bô̆k vih tŏk bŏk oei tơgop tih tên ăn tơdrong tang găn păng tơjră pơrang jĭ păng vei lăng jơhngơ̆m jăn kon pơlei. Anih jang Y tê̆ thĭ xăh păng 12 anih jang y tê̆ xăh phương lơ̆m tơring hlôi akŏm đei 15 khul jang y tê̆ bô̆k vih hơnơ̆ng tơ̆ tơring vă hơlen khăm jơhngơ̆m jăn kon pơlei pơm kiơ̆ pơkăp oei tơklăh tơ̆ hnam păng đak muh pham test renh kơchăng hăm dôm bơngai mă nhôm đei ƀơm jĭ COVID-19. 

Kiơ̆ kơ ƀok Nguyễn Mạnh Hùng, Ƀĭ thư đảng ủy, Kơdră Anih vei lăng kon pơlei phương Đoàn Kết – anih tŏk bŏk oei đei lơ bơngai ƀơm jĭ COVID -19 kơ thĭ xăh Buôn Hồ tơdrong pơjing Anih jang y tê̆ bô̆k vih gô tơjur tơdrong hrat ăn anih jang pơgang lơ̆m tơdrong hơmet jĭ, tơgŭm ăn bơngai jĭ lơ̆m tơring, gơnơm đơ̆ng noh hlôi pơjing đon lui ăn kon pơlei tơ̆ tơring: “Anih jang y tê̆ bô̆k vih mă tơm noh đe ƀak sih pơdơh hưu, đe thây pơgang đei anih tĕch pơgang lơ̆m tơring, kon pơlei nhôn măt bơngai tŏ xĕt noh nhôn xơkơ̆t 1 anih jang đĕch mă lei ăh kăl mă pơm kiơ̆ Tơchơ̆t 16 đunh năr mă jang ưh kơ keh noh nhôn athei tơlĕch trong jang mă 2 noh pơjing minh Anih jang dơ̆ng”

Ưh adrô̆ plei tơm Buôn Ma Thuột păng thĭ xăh Buôn Hồ, đơ̆ng rŏng kơ đei pơgơ̆r đơ̆ng Thủ tướng teh đak, Anih tơm Y tê̆, Anih jang Y tê̆ Đăk Lăk hlôi pơgơ̆r dôm apŭng, thĭ xăh, plei tơm lơ̆m dêh char tenh kuăng pơjing dôm anih jang y tê̆ bô̆k vih tơ̆ dôm xăh, phương, thĭ trâ̆n đei hơbuh pơrang jĭ vă kơchăng khăm hơlen jơhngơ̆m jăn ăn kon pơlei, ưh đei lê̆ tơdrong kơƀăh găh y tê̆.  

Ƀak sih Trần Thuận, Kơdră Anih jang Y tê̆ apŭng Krông Búk, minh apŭng “tơring hơbuh jĭ” kơ dêh char ăn tơbăt: Vă pơjing anih jang y tê̆ bô̆k vih, Anih jang hlôi hơvơn bơngai jang kơ anih jang, tơ̆ dôm anih jang y tê̆ xăh, khul jang y tê̆ tơ̆ hnam trưng hŏk păng kang ƀô̆ y tê̆ pơdơh hưu. ‘Nguaih kơ dôm tơmam drăm kăl, pơgang kiơ̆ pơkăp bảo hiểm y tê̆ hlôi đei, Anih jang oei axong ăn dôm anih jang y tê̆ bô̆k vih kơƀĭnh ô xy vă ‘măn hơmet ăn bơngai ƀơm jĭ COVID-19 kơtă mưh bơngai ƀơm F0 tŏk lơ: “Dang ei đei gre noh nhôn hơnơ̆ng chơ khul jang, hơbŏ dơning noh ba hơmet ăn pơlei âu noh kơnh năm tơ̆ pơlei nai chơ ‘nhăk Khul jang y tê̆ păng tơmam drăm năm tơ̆ pơlei noh, chă bô̆k vih kiơ̆ tơdrong kăl kăp gĭt kơ tơring Tây Nguyên noh nhôn ‘nhăk khul jang chă năm khăm hơlen hơmet jĭ ăn kon pơlei kiơ̆ rim pơlei. Tơdrong kăp gĭt dang ei noh ba hơlen kơjăp băt hơdăh tơdrong kơchăng đơ̆ng kon pơlei păng băt đei tơdrong tang găn jĭ đơ̆ng kon pơlei” 

Mă ‘nao tơmơ̆t jang tơ̆ minh ƀar tơring mă pơrang jĭ COVID -19 tŏk bŏk oei hơbuh hli tơ̆ Đăk Lăk, chŏng mă dôm anih jang y tê̆ bô̆k vih păng anih jang y tê̆ minh anih tŏk bŏk chĕp vei xơnong jang tơgŭm dih băl, vă chă khăm hơlen jơhngơ̆m jăn hơmet jĭ ăn kon pơlei lơ̆m khei năr pơm kiơ̆ pơkăp oei tơklăh lơ̆m tơpôl.

Lan chih păng pơre nơ̆r