VOV4.Bahnar - Kiơ̆ ƀok Mai Đình Phong, Phŏ Kơ dră Anih dăr lăng – Anih jang unh điên Dak Lak, lơ̆m dôm năr pơ dơ̆h lêh, kơ măy dăr hơ len kơ dâu kơ dih ăn ƀôh kơ sô̆ unh điên tơ̆ 1 anih jang pơm tơ̆ Tơ ring jang kơ măy Hòa Phú, plt Buôn Ma Thuột tŏk tôch lơ, anih jang unh điên truh hơ len năng, ƀôh anih âu pơ lăp kơ măy chă jên ki thuơ̆t sô̆, iŏk yoa unh điên ưh kơ trŏ hăm nơ̆r pơ kăp. Anih âu hlôi đei sek phak hăm kơ sô̆ jên hlŏh 70 triu.

Anih tĕch mơ dro chô̆ kơ măy chă jên ki thuơ̆t sô̆ tơ̆ Dak Lak

Kŭm pơ dăr găh kơ jă điên mơ̆n, ‘nao âu 1 anih jang tih tơ̆ Dak Lak đei sek phak truh 285 triu hlak jên. Jô̆ đơ̆ng blŭng sơ năm truh dang ei, lơ̆m dêh char Dak Lak chă ƀôh 882 tơ drong glăi găh iŏk yoa unh điên, hăm kơ sô̆ jên phak vă jê̆ 950 triu. Ƀok Mai Đình Phong ăn tơ băt, dôm tơ drong glăi găh iŏk yoa unh điên ưh trŏ hăm nơ̆r pơ kăp, tơ tông unh điên sư pơm tơ lĕch tơ drong krê ăn kơ dih kâu bơ ngai chô̆ ôn, kŭm nhen tơ drong sơ đơ̆ng ăn tơ lei unh điên hai.

Dơ̆ng: Tơ blơ̆