VOV4.Bahnar - Khul kơ dră tĕh đak hlôi tơ lĕch tơ drong Tơ chơ̆t kơ sô̆ 63/NQ-CP găh dôm tơ drong jang, trong jang tơm vă tưk tơ iung tơ drong jang tŏk, tơ lĕch jên jang tĕh đak păng tĕch mơ dro tơ mam tơ̆ tĕh đak đe kơ jăp ‘lơ̆ng lơ̆m dôm khei hơ tuch sơ năm 2021 păng ƀât blŭng sơ năm 2022. Gơ măng 12-7, nơ̆r tơ roi đơ̆ng Grŭp Anih mong jên Việt Nam (VNBA) ăn tơ băt đei 16 anih mong jên tĕch mơ dro drơ̆ng nơ̆r tơ jur jên kon đơ̆ng tŏk iŏk vă tơ gŭm ăn anih tĕch mơ dro yak hlŏh mơ mat tat đơ̆ng jĭ Covid-19. Dôm anih tĕch mơ dro tơ̆ dêh char Dak Lak tôch tơ rĕk truh tơ drong ‘nâu, yoa ‘nâu jĭ tơ drong ‘lơ̆ng vă đe sư yak hlŏh mơ mat tat, tơ iung dơ̆ng tơ drong jang xa, tĕch mơ dro.

Kiơ̆ kơ sô̆ chih jô̆ đơ̆ng Anih mong jên tĕh đak dêh char Dak Lak: Jô̆ truh ‘năr 31/5/2021, dôm anih asong tŏk iŏk jên lơ̆m dêh char đei kơ sô̆ jên asong tŏk iŏk ƀơm ưh ‘lơ̆ng đơ̆ng jĭ Covid –19 'nŏh 15.436 ti. Kơ plăh dang ei, dôm anih asong tŏk iŏk jên hlôi tơ jur jên kon ăn 7.892 'nu bơ ngai hăm kơ sô̆ jên tŏk iŏk truh 6.401 ti, kơ sô̆ jên kon đei tơ jur, ưh kơ iŏh 'nŏh 8 ti 814 triu hlak. Tơ drong dôm anih mong jên tơ jur jên kon hăm anih tĕch mơ dro, tơ gŭm ăn đe sư tơ jur ƀiơ̆ tơ drong mơ mat tat. Mă lei 'nâu jĭ kơ sô̆ ưh kơ lơ, lăp tŏ sĕt đĕch.

Lơ bơ ngai tơ̆ Dak Lak oei gô chang păng hơ mĕng dôm anih mong jên tơ jur jên kon kiơ̆ nơ̆r pơ tho đơ̆ng Khul Kơ dră tĕh đak kŭm nhen Anih mong jên tĕh đak Việt Nam vă gơ̆h tŏk klăih đơ̆ng mơ mat tat lơ̆m khei 'năr đei jĭ hrei 'nâu.

Kơ dră chĕp kơ̆l 1 công ty jang xa, tĕch mơ dro chĕh phe tơ̆ apŭng Krông Pắk, dêh char Dak Lak ăn tơ băt: dang ei công ty oei hre anih mong jên vă jê̆ 50 ti. Sơ năm 2020 công ty kŭm đei anih mong jên tơ jur jên kon. Mă lei sơ năm 2021 âu, jên kon oei vei hơ nơ̆ng. 

Ƀok Nguyễn Hữu Hoàng Dương, Kơ dră chĕp kơ̆l Công ty tĕch mơ dro hăm tĕh đak đe Hoàng Dương Ban Mê ăn tơ băt: Dang ei công ty oei hre kơ anih mong jên 8 ti 700 triu, jên kon 9,9% 1 sơ năm. 2 sơ năm tơ jê âu tơ drong jang xa, tĕch mơ dro đơ̆ng công ty ưh kĕ tŏk yoa đơ̆ng jĭ Covid - 19. Tơ mam tĕch ưh hlot, oei kơ jă tơ mam vă răt iŏk ‘nŏh tŏk, jên kon tơ̆ anih mong jên ưh đei jur kiơ.

“Dang ei anih tĕch mơ dro tam mă ƀôh 1 tơ drong tơ gŭm yơ đơ̆ng anih mong jên. Lơ̆m khei ‘năr đei jĭ âu, 2 sơ năm ‘nâu anih tĕch mơ dro tôch mơ mat tat. Tơ mam ‘nŏh ưh gơ̆h tĕch ‘ngoăih kơ dêh char kơ na tôch mơ mat tat. Hơ pơi ‘mĕh anih mong jên pơ jing tơ drong ‘lơ̆ng ăn anih tĕch mơ dro vă anih tĕch mơ dro kĕ jang xa lơ̆m pơ yan đei jĭ âu. Hơ pơi ‘mĕh anih mong jên tơ jur jên kon ăn công ty, vă công ty kla hre dar dĕh păng kla jên kon tŏ sĕt ƀiơ̆ thoi nŏh gơ̆h kĕ jang xa.”

Agribank Bắc Dak Lak jĭ anih mong jên oei tơ jur jên kon păng asong tŏk iŏk hăm jên kon tŏ sĕt ăn anih tĕch mơ dro tơ̆ Dak Lak ƀơm ưh ‘lơ̆ng đơ̆ng jĭ Covid - 19

Ƀok Nguyễn Văn Sanh, Kơ dră chĕp kơ̆l HTX pơ vih ăn tơ drong choh jang xa Thanh Bình, xăh Dur Kmăl, apŭng Krông Ana ăn tơ băt: Pơ yan ƀa phang âu ki, HTX pơ vih ăn tơ drong choh jang xa Thanh Bình jang hơ doi hăm Anih tơ chĕng hơ len păng atŏk tơ iung ‘long pơ tăm Việt Nam pơ tâp pơ hrăm ki thuơ̆t rei pơ tăm ƀa ƀâu phu Đài thơm 8 kiơ̆ tơ drong hơ găt VietGAP ăn kon pơ lei jang lơ̆m HTX. Trong jang âu sư pơih đei trong jang xa, ot tĕch phe ƀa ‘lơ̆ng. Hơ drô̆ ƀok Sanh hlôi pơ dơ̆ng hla ar tĕh păng tơ mam unh hnam ƀok vă tŏk iŏk 3 ti 400 triu vă jang xa, tĕch mơ dro. Truh dang ei, ƀok Sanh kŭm nhen dôm bơ ngai jang lơ̆m HTX tam mă đei anih mong jên tơ gŭm, tơ jur jên kon kiơ.

“Hrei ‘nâu tôch mơ mat tat găh jên jang, mă loi ‘nŏh jên vă tang găbn đak lơ̆p, tang găn tŏ phang, hơ met ming anih jang tôch kăl đei jên. Găh tơ drong jang hơ doi, đei 1,2 ‘nu bơ ngai jang, kŭm hăm kơ dră chĕp kơ̆l athei tơ lĕch tơ mam kơ dih vă pơ dơ̆ng tŏk iŏk jên tơ̆ anih mong jên, vă đei jên kla jên điên, jên hơ met ming, kla jên kŏng - jên khei ăn 'nhŏng ŏh. Truh dang ei tam đei anih mong jên yơ tơ gŭm jên kon. Hơ pơi 'mĕh, yoa tơ drong jĭ 'nâu anih mong jên tơ gŭm, tơ jur ƀiơ̆ 1 păh jên kon.”

Nơ̆r tơ roi găh tơ drong 16 anih mong jên tĕch mơ dro, Grŭp Anih mong jên Việt Nam (VNBA) drơ̆ng nơ̆r tơ jur jên kon vă tơ gŭm ăn anih tĕch mơ dro yak hlŏh mơ mat tat yoa đơ̆ng jĭ Covid -19 ‘nŏh jĭ tơ drong tôch lăp kơ plăh dang ei. ‘Nâu jĭ tơ drong mă anih tĕch mơ dro oei hơ mĕng, gô chang hrei ‘nâu.

Lê Xuân Lãm: Chih

Dơ̆ng: Tơ blơ̆